ބޭންކް އޮފް މޯލްޑިވްސް (ބީއެމްއެލް) އިން މިހާރު އެ ބޭންކުގެ އޭޓީއެމް އަދި ޕީއޯއެސް ޓާމިނަލްތަކުގައި ރުޕޭ ކާޑު ބޭނުންކުރެވޭނެ އިންތިޒާމު ހަމަޖައްސައިފިއެވެ.
ރުޕޭއަކީ ނޭޝަނަލް ޕޭމަންޓްސް ކޯޕަރޭޝަން އޮފް އިންޑިއާ (އެންޕީސީއައި)ގެ ޕްރޮޑަކްޓެއް ކަމަށްވާ، މިހާރު ދުނިޔޭގެ 300 މިލިއަނަށްވުރެ ގިނަ މީހުން ބޭނުންކުރަމުންދާ އިންޑިއާގެ ފުރަތަމަ ގްލޯބަލް ކާޑު ޕޭމަންޓް ނެޓްވޯކެވެ.
ރާއްޖޭގައި ރުޕޭ ކާޑު ބޭނުންކުރެވޭނެ މަގު ތަނަވަސްވެގެން ދިޔައީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިންޑިއާއަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ. ބީއެމްއެލްގެ ޑައިރެކްޓާ އޮފް ރީޓެއިލް، ބިޒްނަސް އެންޑް އެސްއެމްއީ ބޭންކިން މޫސާ ނިމާލް ވިދާޅުވީ، ރާއްޖޭގައި ރުޕޭ ކާޑު ބަލައިގަތުމުގެ މަގު ފަހިވުމަކީ އުފާވެރި ކަމެއް ކަމަށާއި، މިކަމުގެ ސަބަބުން ރުޕޭ ކަސްޓަމަރުންނަށް ފައިސާ ދެއްކުން ވަރަށް ބޮޑަށް ފަސޭހަވެގެންދާނެ ކަމަށެވެ.
ބީއެމްއެލްގެ ފުޅާ ބޭންކިން ވިއުގައިގެ ތެރޭގައި 20 އަތޮޅުގައި 39 ބްރާންޗު، 88 ސެލްފްސާވިސް ބޭންކިން ސެންޓަރު، 143 އޭޓީއެމް، އަދި 7000 އަށްވުރެ ގިނަ މާޗަންޓުންނާއި ކޭޝް އޭޖެންޓުންގެ ހިދުމަތް ހިމެނެއެވެ. މީގެ އިތުރުން، އެންމެ ޒަމާނީ އޮންލައިން ބޭންކިން ހިދުމަތްވެސް ފޯރުކޮށްދެއެވެ.
ރައީސް މުއިއްޒާއި އިންޑިއާގެ ބޮޑުވަޒީރު ނަރެންދުރަ މޯދީ ބޭއްވެވި ބައްދަލުކުރެއްވުމަށްފަހު، ރާއްޖޭގައި ރުޕޭގެ ފުރަތަމަ ޓްރާންސެކްޝަން ހެދި މަންޒަރު ދައްކާލެވުނެވެ. މި ޓްރާންސެކްޝަން ކުރެވުނީ އޮތެންޓިކް މޯލްޑިވްސްގެ ފިހާރައެއްގައެވެ. އަދި ކުރިއަށް އޮތްތަނުގައި ރާއްޖޭގައި އިންޑިއާގެ ޔުނިފައިޑް ޕޭމަންޓު އިންޓަފޭސް (ޔޫޕީއައި)ގެ ހިދުމަތްވެސް ތަޢާރަފުކުރެވޭނެ ކަމަށް ބޮޑުވަޒީރު މޯދީ ވިދާޅުވިއެވެ.
