މޫސުމާބެހޭ ޤައުމީ އިދާރާއިން ރާއްޖޭގެ ބޮޑު ބަޔަކަށް ޔެލޯ އެލާޓެއް ނެރެފިއެވެ. މިއީ ބޯކޮށް ވާރޭވެހި، ކަނޑުތައް ވަރަށް ގަދަވާނެކަމަށް ލަފާކުރެވޭތީއެވެ. މި އެލާޓް ދެމިގެންދާނީ ހެނދުނު 6:00 އިން 10:00 އާ ހަމައަށެވެ. އަދި މީގެ ދަށުން ހިމެނެނީ ހއ. އަތޮޅުން ފެށިގެން ތ. އަތޮޅާ ހަމައަށް ހުރި ސަރަހައްދުތަކެވެ.
މޫސުމާބެހޭ އިދާރާއިން މަޢުލޫމާތު ދެއްވާގޮތުގައި، މި ސަރަހައްދުތަކުގައި ގަޑިއަކު 25 އާއި 30 މޭލާ ދެމެދުގެ ބާރުމިނުގައި ވައި ޖަހާނެއެވެ. އަދި ވިލާގަނޑުގައި ވައިގެ ބާރުމިން ގަޑިއަކު 50 މޭލަށް އަރާފާނެކަމަށް ބެލެވެއެވެ. މީގެ އިތުރުން، އެހެން ހިސާބުތަކަށްވެސް ވިއްސާރަކޮށް، ބައެއް ރަށްރަށަށް ބޯކޮށް ވާރޭވެހި، ގުގުރުމާއެކު ވާރޭވެހުން އެކަށީގެންވެއެވެ. ރާއްޖޭގެ ކަނޑުގެ އުދައިގެ އުސްމިން 5 އާއި 8 ފޫޓާ ދެމެދުގައި ހުންނާނެކަމަށްވެސް ލަފާކުރެވެއެވެ.
މި ނުރައްކާތެރި މޫސުމާ ގުޅިގެން، މޫސުމާބެހޭ ޤައުމީ އިދާރާއިން ވަނީ ރައްޔިތުންނަށް ސަމާލުވުމަށް އިލްތިމާސްކޮށްފައެވެ. ވީމާ، މި ދުވަސްވަރު ކަނޑުދަތުރުފަތުރު ކުރާއިރު އިތުރަށް ސަމާލުވެ، ރައްކާތެރިކަމުގެ ފިޔަވަޅުތައް އަޅަންޖެހޭނެއެވެ.
