ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީގެ ޑިރެކްޓަރު އާއިޝަތު ޝޫޒާ ވަޒީފާއިން ވަކިވާން މަޖުބޫރު ކުރި ކަމަށާއި މުވައްޒަފުންގެ މެދުގައި ތަފާތު ކުރުން ގެންގުޅޭ ކަމަށް ކުރެވުނު ތުހުމަތާ ގުޅިގެން ސިވިލް ސާވިސް ކޮމިޝަން (ސީއެސްސީ) އިން މައްސަލަ ބެލުމަށް ފަށައިފިއެވެ.

ސީއެސްސީގެ ރައީސް މުހައްމަދު ނާސިހް ވިދާޅުވި ގޮތުގައި މި މައްސަލަ މިހާރު ދަނީ ބަލަމުންނެވެ. މި މައްސަލަ ޢާންމުވީ މިނިސްޓްރީގެ "އެލްޑާލީ ޑިޕާޓްމަންޓް" ހެލްތު މިނިސްޓްރީގެ ދަށަށް ބަދަލުކުރުމާ ގުޅިގެން ބޭއްވުނު ބައްދަލުވުމެއްގައި ޝޫޒާ ދެއްކެވި ވާހަކައެއްގެ ވީޑިއޯ ސޯޝަލް މީޑިއާގައި އާންމު ވުމުންނެވެ.

ޝޫޒާ ވިދާޅުވި ގޮތުގައި މިނިސްޓްރީން ވަނީ އެއްވެސް ސަބަބެއް ނެތި އޭނާގެ މަސައްކަތްތަކަށް ހުރަސްއަޅައި، ކޮމިޓީތަކުން ބޭރުކޮށް، އެޗްއޯޑީ ކަމުން ވަކިކޮށް، އަދި އިސްވެރިންގެ ބައްދަލުވުންތަކަށް ވަނުން މަނާކޮށްފައެވެ. މިނިސްޓްރީން މި ތުހުމަތުތައް ދޮގުކޮށް ބުނެފައިވަނީ އެއްވެސް މުވައްޒަފަކު ވަޒީފާއިން ވަކިކޮށްފައި ނުވާ ކަމަށާއި އެފަދަ މަޖުބޫރުކަމެއް އެއްވެސް މުވައްޒަފަކާ މެދު ގެންގުޅެފައި ނުވާ ކަމަށެވެ.

މީގެއިތުރުން، ދިވެހިބަހާއި ސަގާފަތާބެހޭ މިނިސްޓްރީގެ އެކްޓިން ޕީއެސް އާތިކާ އިބްރާހިމް އިސްވެ ހުންނަވައި ސިވިލް މުވައްޒަފުންނަށް ޖެއްސުންކޮށް ބުލީކުރާ ކަމަށް ބުނާ މައްސަލައެއްވެސް ވަނީ ފެންމަތިވެފައެވެ. މި މައްސަލައިގައި 22 މުވައްޒަފަކު ސޮއިކޮށް ސީއެސްސީއަށް ވަނީ ޕެޓިޝަނެއް ހުށަހަޅާފައެވެ.

ނަމަވެސް އާތިކާއާއި މިނިސްޓަރު އާދަމް ނަސީރު އިބްރާހިމް ވަނީ މި ތުހުމަތުތައް ދޮގުކުރައްވާފައެވެ.