މިދިޔަ މަހު އިހަވަންދިއްޕޮޅުގައި ފެށުނު އުތުރު މެރިޓައިމް ސަރވިސްއަށް ވެމްކޯގެ ފަރާތުން ބައެއް ޚިދުމަތްތައް ހޯދުމަށް އެމްޕީއެލް އަދި ވެމްކޯއާ ދެމެދު އެމްއޯޔޫއެއްގައި ސޮއިކުރެވިއްޖެއެވެ.
މި އެއްބަސްވުމުގައި އެމްޕީއެލްގެ ފަރާތުން ސޮއިކުރެއްވީ އެ ކުންފުނީގެ ސީއީއޯ މުހައްމަދު ވަޖީހު އިބްރާހީމެވެ. އަދި ވެމްކޯގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު މުޖުތަބާ ޖަލީލެވެ.
ވަޖީހު ވިދާޅުވިގޮތުގައި މިހާރު ޚިދުމަތްތައް ފެށިގެން ކުރިއަށްދަނީ އިންޓަރނޭޝަނަލް ބަންކަރިންގގެ ޚިދުމަތެވެ. މިކަމުގައި ދިވެހި ސަރުކާރުގެ ގިނަ ކުންފުނިތަކެއް ބައިވެރިވެފައިވާކަމަށާއި، އެސްޓީއޯއާއި އެމްޕީއެލްގެ އިތުރުން ވެމްކޯވެސް މިއަދު ބަންކަރިންގ ޚިދުމަތާ ގުޅުނުކަމަށް އޭނާ ފާހަގަކުރެއްވިއެވެ. ބަންކަރިންގެ ޚިދުމަތް ހޯދަން އަންނަ ބޯޓުތަކުން އުފެދޭ ކުނި ނައްތާލުމުގެ ޚިދުމަތް ވެމްކޯއާ ހަވާލުކުރެވިފައިވާކަމަށާއި، މީގެ ސަބަބުން ވެމްކޯއަށްވެސް އެކަށީގެންވާ އާމްދަނީއެއް ލިބިގެންދާނެކަމަށް ވަޖީހު ވިދާޅުވިއެވެ.
ވެމްކޯގެ އެމްޑީ މުޖުތަބާ ވިދާޅުވީ ބޯޓުތަކުގައި ހުންނަ ބޭނުންކޮށްފައިވާ ތެޔޮ ނައްތާލުމަކީ ބޮޑު ގޮންޖެހުމެއް ކަމުގައިވިޔަސް، ވެމްކޯގެ މެކޭނިޒަމްގެ ދަށުން އެ ޚިދުމަތް ފޯރުކޮށްދެވޭނެ ކަމަށެވެ. އުތުރުގައި ވެމްކޯގެ މެގަ ވޭސްޓް މެނޭޖްމަންޓް ސަރވިސް ސެންޓަރެއް ޤާއިމުކޮށްފައިވާ ކަމަށާއި، އދ. ކުނބުރުދޫގައި ރީޖަނަލް ވޭސްޓް ސެންޓަރެއް ޤާއިމުކުރުމުގެ މަސައްކަތް ކުރަމުންދާކަމަށް އޭނާ ވިދާޅުވިއެވެ.
ރާއްޖޭގައި ބަންކަރިންގ ޚިދުމަތް ފެށީ އެސްޓީއޯއިން ކަމަށާއި، މިއާއެކު ބަންކަރިންގ ޚިދުމަތަށް ބޭނުންވާ މެރިޓައިމް ޚިދުމަތްތައް ފޯރުކޮށްދިނުމަށް ހަވާލުކޮށްފައިވަނީ އެމްޕީއެލްއާކަން ފާހަގަކޮށްލެވެއެވެ.
