ޗާންދަނީމަގުގައި ހުންނަ ސްވެނިއާ ފިހާރައަކަށް ވަދެ ވައްކަންކުރި މައްސަލައިގައި ސ. ހިތަދޫ، މުޙައްމަދު އަސްލަމްގެ މައްޗަށް ކްރިމިނަލް ކޯޓުން ޙުކުމްކޮށްފިއެވެ.
މިދިޔަ ޖޫން 24 ވަނަ ދުވަހުގެ ދަންވަރު ހިނގި މި ހާދިސާގައި އަސްލަމްގެ މައްޗަށް ތިން ދަޢުވާއެއް އުފުލުނެވެ. އެއީ މުދަލަށް ގެއްލުންދިނުމާއި، ހުއްދަނޫން ގޮތުގައި މުދަލުގެ މައްޗަށް ބާރުހިންގުމާއި، އަދި ހުއްދަނޫން ތަނަކަށް ވަނުމުގެ ކުށެވެ. އަސްލަމް މި ތިން ދަޢުވާއަށްވެސް އިޢުތިރާފުވިއެވެ.
ފިހާރައިގެ އެލާމް ސިސްޓަމް ހަލާކުކޮށް، ކޭޝް ޑްރޯއިން 300 ޑޮލަރު ނެގިކަމަށް ތުހުމަތުކުރެވުނެވެ. ޙުކުމް ކަނޑައެޅުމުގައި އަސްލަމްގެ ކުށުގެ ރެކޯޑަށް ރިޢާޔަތްކުރެވުނެވެ. ފާއިތުވި ދެ އަހަރުގެ ތެރޭގައި ޖުނަޙުގެ ކުށެއް ސާބިތުވެފައިވުމާއި، މިފަދަ ކުށެއް ސާބިތުވި ދެވަނަ ފަހަރަށްވުމުން އަދަބު ދެ ދަރަޖަ މަތިކުރެވުނެވެ. ނަމަވެސް އިޢުތިރާފުވެފައިވާތީ އެއް ދަރަޖަ ދަށްކުރެވުނެވެ.
ތަޙުޤީޤު މަރުޙަލާގައި ހޭދަކުރި 28 ދުވަސް އުނިކުރުމަށްފަހު، އަސްލަމްގެ މައްޗަށް ޖުމްލަ 8 މަހާއި 24 ދުވަހުގެ ޖަލު ޙުކުމެއް ކަނޑައެޅުނެވެ. މީގެ ތެރޭގައި ހުއްދަނޫން ގޮތުގައި މުދަލުގެ މައްޗަށް ބާރުހިންގުމުގެ ކުށަށް 5 މަހާއި 2 ދުވަސް، ހުއްދަނޫން ތަނަކަށް ވަނުމުގެ ކުށަށް 3 މަސްދުވަސް، އަދި މުދަލަށް ގެއްލުންދިނުމުގެ ކުށަށް 22 ދުވަސް ހިމެނެއެވެ.
