ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީގެ ޑިރެކްޓަރު އާއިޝަތު ޝޫޒާ، 17 އަހަރުގެ ޚިދުމަތަށްފަހު، މަޤާމުން ވަކިވުމަށް މަޖުބޫރުކުރުވައި ވަޒީފާގެ މާޙައުލުގައި ދަތިކުރަމުންދިޔަ ކަމަށް ބުނެ، މިނިސްޓްރީގެ އިސްވެރިންނަށް ސީރިއަސް ތުހުމަތުތަކެއް ކޮށްފިއެވެ.

މީސްމީޑިއާގައި ފެތުރިފައިވާ ވީޑިއޯއެއްގައި، ޝޫޒާއަށް އެކި ގޮތްގޮތުން ދަތިކުރި ކަމުގެ ތަފްޞީލު ހިއްސާކޮށްފައިވެއެވެ. "އެލްޑާލީ ޑިޕާޓްމަންޓް" ހެލްތު މިނިސްޓްރީގެ ދަށަށް ބަދަލުކުރުމާ ގުޅިގެން، ޑިސެމްބަރު 2023 އާ ހަމައަށް ޝޫޒާ ކުރަމުންދިޔަ ހުރިހާ މަސައްކަތެއް އަތުލައި، ކޮމިޓީތަކުން ބޭރުކޮށް، އެޗްއޯޑީ މަޤާމުން ވަކިކޮށް، އިސްވެރިންގެ ބައްދަލުވުންތަކުން މަނާކޮށް، އާދައިގެ ކޭސް ވޯކަރަކަށް ބަދަލުކުރި ކަމަށް އޭނާ ބުނެފައިވެއެވެ.

ޝޫޒާ ބުނެފައިވަނީ، އަންހެނުންނާއި ކުޑަކުދިންނާއި ނިކަމެތިންގެ ޙައްޤުތައް ހޯދައިދޭން މަސައްކަތްކުރާ މިނިސްޓްރީއަކުން އޭނާގެ ޙައްޤުތައް ނިގުޅައިގަނެ، ނަފްސާނީގޮތުން ބޮޑެތި އަނިޔާތަކެއް ދީފައިވާ ކަމަށެވެ. މި މައްސަލަ މީސްމީޑިއާގައި ފެތުރުމާ ގުޅިގެން، ގިނަ ބަޔަކު ވަނީ މިކަން ތަޙްޤީޤުކުރުމަށް ސަރުކާރަށް ގޮވާލާފައެވެ.

އެހެންނަމަވެސް، މިނިސްޓްރީން ވަނީ ޝޫޒާގެ ތުހުމަތުތައް ދޮގުކޮށްފައެވެ.

މިމައްސަލައާއި ގުޅިގެން މިނިސްޓްރީން ނެރުނު ބަޔާނުގައި ބުނެފައިވަނީ، "އެލްޑާލީ ޑިޕާޓްމަންޓް" ހެލްތު މިނިސްޓްރީގެ ދަށަށް ބަދަލުކުރުމާ ގުޅިގެން، އެއްވެސް މުވައްޒަފެއްގެ މަޤާމަށް ބަދަލެއް ނުގެނެސް، އެ ޑިޕާޓްމަންޓްގެ މުވައްޒަފުން ހެލްތު މިނިސްޓްރީގެ ދަށަށް ބަދަލުކޮށްފައިވާ ކަމަށެވެ. އަދި މި ބަދަލާ ގުޅިގެން އެއްވެސް މުވައްޒަފަކު ވަޒީފާއިން ވަކިކޮށްފައި ނުވާނެ ކަމަށާއި، އެފަދަ މަޖުބޫރުކަމެއް ވެސް އެއްވެސް މުވައްޒަފަކާމެދު ގެންގުޅެފައި ނުވާނެ ކަމަށް މިނިސްޓްރީން ބުނެފައިވެއެވެ.