އިމިގްރޭޝަނުން ހިންގި އޮޕަރޭޝަނެއްގައި ހުޅުމާލޭގެ ދެ އެކޮމޮޑޭޝަން ބްލޮކެއް ބަލައި ފާސްކޮށް، އަށް މީހަކު އެ އިދާރާގެ ބެލުމުގެ ދަށަށް ގެންގޮސްފިއެވެ.
މިއީ ގަވާއިދާ ހިލާފަށް އުޅޭ ބިދޭސީން ހޯދުމަށް ކުރަމުންދާ މަސައްކަތުގެ ބައެކެވެ. މި އޮޕަރޭޝަންގައި އަލަށް އިމިގްރޭޝަނަށް ވަންނަ އޮފިސަރުންގެ ތެރެއިން "އިމިގްރޭޝަން އޮފިސަރ ޓްރެއިނީސް" ވެސް ބައިވެރިވިއެވެ.
އިމިގްރޭޝަނުން ޢާންމުކުރި ތަފާސްހިސާބުތަކުން ދައްކާ ގޮތުގައި، މިދިޔަ 10 މަސްދުވަހުގެ ތެރޭގައި މި ސަރުކާރުން 4,054 ބިދޭސީން ވަނީ ޑީޕޯޓްކޮށްފައެވެ. މި މުއްދަތުގައި އެންމެ ގިނަ ބިދޭސީން ޑީޕޯޓްކޮށްފައިވަނީ ޖޫން މަހުގައެވެ. އެއީ 690 މީހުންނެވެ. ދެން އެންމެ ގިނައީ ސެޕްޓެމްބަރު މަހުގެ 17 ވަނަ ދުވަހާ ހަމައަށް ޑީޕޯޓްކުރެވުނު 663 މީހުންނެވެ.
އެއަށްފަހު ޖުލައި މަހު 461 މީހުންނާއި، އޮގަސްޓް މަހު 453 މީހުން ޑީޕޯޓްކުރެވުނެވެ. މެއި މަހު 377 މީހުންނާއި، މާރިޗް މަހު 332 މީހުން، ފެބްރުވަރީ މަހު 309 މީހުން، ޖަނަވަރީ މަހު 237 މީހުން، އޭޕްރިލް މަހު 240 މީހުން، އަދި ޑިސެމްބަރު މަހު 202 މީހުން ޑީޕޯޓްކުރެވުނެވެ. އެންމެ މަދު މީހުން ޑީޕޯޓްކުރެވުނީ ނޮވެމްބަރު މަހުގެ 17 އިން ފެށިގެން އެ މަހުގެ ނިޔަލަށެވެ. އެއީ 90 މީހުންނެވެ.
