ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޑިއާގެ ރައީސް ދުރޫޕަދީ މުރުމޫގެ ދަޢުވަތަކަށް އެ ޤައުމަށް ރަސްމީ ދަތުރުފުޅެއް ކުރައްވަން ނިންމަވައިފިއެވެ.
ރައީސް އޮފީހުން އިޢުލާންކޮށްފައިވާ ގޮތުގައި މި ދަތުރުފުޅު ފައްޓަވާނީ އަންނަ އާދީއްތަ ދުވަހު، އޮކްޓޯބަރު 6 އިން 10 އަށެވެ. މިއީ ރައީސް މުޢިއްޒު ވެރިކަމާ ހަވާލުވެވަޑައިގެންނެވި ފަހުން އިންޑިއާއަށް ކުރައްވާ ދެވަނަ ރަސްމީ ދަތުރުފުޅެވެ.
ދަތުރުފުޅުގެ ތެރޭގައި ރައީސް މުޢިއްޒު އިންޑިއާގެ ރައީސާއި، ބޮޑުވަޒީރާއި އަދި އެހެނިހެން އިސް މަސްއޫލުވެރިންނާ ބައްދަލުކުރައްވައި، ދެ ޤައުމުގެ ގުޅުން އިތުރަށް ބަދަހިކުރެއްވުމަށް މަޝްވަރާކުރައްވާނެއެވެ. ރައީސްގެ އަރިހުގައި ދިވެހި ސަރުކާރުގެ މަތީ ފެންވަރުގެ ވަފުދެއް ބައިވެރިވެވަޑައިގަންނަވާނެ އިރު، ދިވެހި ވަފުދުގެ މެހްމާންދާރީގެ އެންމެހައި ކަންކަން ހަމަޖައްސަވައިދެއްވާނީ އިންޑިއާ ސަރުކާރުންނެވެ.
މި ދަތުރުފުޅާ ގުޅޭ މަޢުލޫމާތު ކުރިން ހާމަކުރެވިފައި ނުވިނަމަވެސް، މިދިޔަ މަހު އިންޑިއާގެ 'ހިންދުސްތާން ޓައިމްސް' ގައި ޝާއިޢުކުރި ލިޔުމެއްގައި ދަތުރުފުޅުގެ ތާރީޚުތަކާއި، ރައީސް ޒިޔާރަތްކުރައްވާނެ ސިޓީތަކުގެ މަޢުލޫމާތު ހިމަނާފައިވެއެވެ. އޭގެ ތެރޭގައި ނިއު ދިއްލީގެ އިތުރުން މުމްބާއީ އަދި ބެންގަލޫރު ހިމެނެއެވެ.
އަދި އިންޑިއާގެ ބޮޑުވަޒީރު ނަރެންދުރަ މޯދީއާ ރައީސް ބައްދަލުކުރައްވާނީ އޮކްޓޯބަރު 7 ގައި ކަމަށްވެސް އެ ލިޔުމުގައި ބަޔާންކޮށްފައިވެއެވެ.
