ޖެންޑާ މިނިސްޓްރީގެ އިސް މަޤާމުތަކުގައި ތިއްބެވި ދެ ބޭފުޅަކު، އެ މިނިސްޓްރީން ވަކިކޮށް އެހެން މިނިސްޓްރީތަކަށް ބަދަލުކޮށްފިއެވެ.
ސްޓޭޓް މިނިސްޓަރު އާމިނަތު ހުސައިން ޝަރީފް ފިޝަރީޒް މިނިސްޓްރީއަށް ބަދަލުކުރެވުނު އިރު، ޑެޕިއުޓީ މިނިސްޓަރު އާމިނަތު ނަމްޒާ ބަދަލުކުރެވިފައިވަނީ ސިޓީސް، ލޯކަލް ގަވަމެންޓް އެންޑް ޕަބްލިކް ވޯކްސް މިނިސްޓްރީއަށެވެ. މި ބަދަލުތައް ގެނެވުނު ސަބަބު ސާފުކުރުމަށް ޖެންޑާ މިނިސްޓްރީއަށް ގުޅުމުން އެއްވެސް ޖަވާބެއް ލިބިފައެއް ނުވެއެވެ.
މި ބަދަލުތަކާ އެއްވަގުތެއްގައި، ކ. ގުރައިދޫގައި ހުންނަ ނުކުޅެދުންތެރިކަން ހުންނަ މީހުންގެ މަރުކަޒު ބަލަހައްޓާ ޑިޕާޓްމަންޓުގެ ޑިރެކްޓަރު އާއިޝަތު ޝޫޒާ ވަނީ އޭނާއާމެދު ތަފާތުކުރުން ގެންގުޅެ، ވަޒީފާއިން ވަކިވާން މަޖުބޫރުކުރި ކަމަށް ތުހުމަތުކޮށްފައެވެ. ޝޫޒާ ވިދާޅުވެފައިވަނީ މިކަމުގެ ސަބަބުން އޭނާއަށް ނަފްސާނީ ގޮތުން އުނދަގޫތަކެއް ކުރިމަތިވެފައިވާ ކަމަށެވެ.
މި ހުރިހާ ހާދިސާތަކަކީ ޖެންޑާ މިނިސްޓްރީގެ އިދާރީ ހިންގުމުގައި ދިމާވެފައިވާ މައްސަލަތަކެއްގެ ނަތީޖާއެއްކަމަށް ބެލެވެއެވެ.
ކޮމެންޓު ފޮނުވާ