އެމްޑީޕީގެ ރައީސް އަބްދުﷲ ޝާހިދު އެމެރިކާ އާއި އދ އަށް ކުރެއްވި ޒިޔާރަތުގައި އދ ގެ ސެކްރެޓަރީ ޖެނެރަލް އެންޓޯނިއާ ގުޓަރޭސްއާ ބައްދަލުކުރައްވައިފިއެވެ.
މި ދަތުރުފުޅަކީ ދުވަސްތަކަކަށްފަހު ލިބުނު ފުރުސަތެއްކަމަށާއި، އެއީ އެމަނިކުފާނަށް ލިބުނު ޝަރަފެއްކަމުގައި ޝާހިދު އެކްސްގައި ކުރެއްވި ޕޯސްޓެއްގައި ފާހަގަކުރެއްވިއެވެ.
ކުރީގެ އދ ގެ އާންމު މަޖިލީހުގެ ރައީސް ޝާހިދު، ގުޓަރޭސްއާ ބައްދަލުކުރެއްވި އިރު އެމްޑީޕީން ބައިނަލްއަޤްވާމީ ފަރާތްތަކާއެކު ކުރަމުންދާ މަސައްކަތްތަކާ ބެހޭގޮތުން މަޝްވަރާކުރެއްވިކަމަށް ވިދާޅުވިއެވެ. މީގެއިތުރުން، އދ އިން ކުރަންޖެހޭ މުހިންމު މަސައްކަތްތަކުގެ ތެރޭގައި އެންމެ މަތީ ފެންވަރުގައި ޑިޕްލޮމެސީއަށް އެހީތެރިވުމާއި، މައްސަލަތަކުގައި މެދުވެރިއެއްގެ ދައުރު އަދާކުރުމާއި، އިތުބާރު އުފެއްދުން ހިމެނޭ ކަމަށް ޝާހިދު ފާހަގަކުރެއްވިއެވެ.
އަދި ހަމައެހެންމެ، ބައިބައިވެފައިވާ އަދި ކޯޅުންތަކުގެ އަސަރުކޮށްފައިވާ މާޙައުލުތަކުގައި ސުލްޙަވެރިކަން ޤާއިމުކުރުމަކީވެސް އދ ގެ މުހިންމު މަސްއޫލިއްޔަތެއްކަމަށް ވިދާޅުވިއެވެ. ޝާހިދު އިތުރަށް ވިދާޅުވީ، ދެމެހެއްޓެނިވި ސުލްޙައާއި އެއްބާރުލުން ހޯދުމަށްޓަކައި ހުރިހާ މުޖުތަމަޢުތަކަށް ބޭނުންވާ ވަސީލަތްތަކާއި ތަމްސީލުވުން ލިބިދިނުމަށް، އެއްވެސް ފަރާތަކަށް ނުޖެހި މަސައްކަތްކުރުމުގެ މުހިންމުކަމެވެ. މިކަންކަމަކީ އދ އިން ޚާއްޞަ ސަމާލުކަމެއް ދޭންޖެހޭ ކަންތައްތައްކަމުގައި ޝާހިދު ފާހަގަކުރެއްވިއެވެ.
