ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު މެންދުރު ނަމާދުގެ ކުރިން މާލޭގެ އާސަހަރާ މިސްކިތާއި ހިނަވާގެ ރަސްމީކޮށް ހުޅުއްވައިދެއްވައިފިއެވެ.
މާލެ ސިޓީގެ މޭޔަރ އާދަމް އާޒިމާއެކު ބޭއްވުނު ޚާއްސަ ރަސްމިއްޔާތެއްގައި ރައީސް މުޢިއްޒު މިސްކިތާއި ހިނަވާގެ ބައްލަވާލައްވައި، ގޯތިތެރޭގައި ކުރެވިފައިވާ ތަރައްޤީގެ މަސައްކަތްތައް ވަނީ ވަޒަންކުރައްވާފައެވެ.
މި މަޝްރޫޢުގެ މަސައްކަތް ފެށިގެން ދިޔައީ ރައީސް މުޢިއްޒު މާލެ ސިޓީގެ މޭޔަރުކަމުގެ މަޤާމުގައި ހުންނެވިއިރުއެވެ. މަރާމާތުގެ މަސައްކަތް ނިމުމާ ގުޅިގެން ބޭއްވުނު ރަސްމިއްޔާތުގައި މާލެ ސިޓީގެ ޑެޕިއުޓީ މޭޔަރ އަޙްމަދު ނަރީޝް ވިދާޅުވީ، މި ތަރައްޤީއާއެކު ކަށުކަމާކެމީގެ ކަންކަމަށް އަންނަ ފަރާތްތަކަށް ބޮޑު ލުއިފަސޭހައެއް ލިބިގެންދާނެ ކަމަށެވެ. އޭގެ ތެރޭގައި ހިނަވާ ކޮޓަރި އިތުރުކުރުމާއި، މައްޔިތާއަށް ޒިޔާރަތްކުރާ ފަރާތްތަކަށް އޭސީކޮށްފައިވާ ޚާއްސަ ސަރަހައްދެއް ހިމެނެއެވެ. އަދި އަންހެނުންނަށް ނަމާދުކުރެވޭނެ އިންތިޒާމު އިމާރާތުގެ ދެ ފަންގިފިލާގައިވެސް ހަމަޖައްސާފައިވާ ކަމަށް އޭނާ ވިދާޅުވިއެވެ.
މަރާމާތުގެ މަސައްކަތާއެކު މިސްކިތުގެ ޖާގަ ބޮޑުކޮށް، ދެ ފަންގިފިލާ އޭސީކޮށް ނަމާދުކުރެވޭގޮތަށް ވަނީ ތައްޔާރުކޮށްފައެވެ. މީގެ އިތުރުން ޚާއްސަ އެހީއަށް ބޭނުންވާ ފަރާތްތަކަށާއި އާންމުންނަށް ވަކި ފާޚާނާތަކެއް ހަދާފައިވެއެވެ. ކުރިން ހުރި ދެ ކޮޓަރީގެ ބަދަލުގައި މިހާރު މައްޔިތާ ހިނެވުމަށް ތިން ކޮޓަރި ހުންނާނެއެވެ. އަދި ތަނުގެ މުވައްޒަފުންނާއި ޖަމާޢަތްތެރިންނަށް ތިބެވޭނެ ވަކި ކޮޓަރިއެއްވެސް ވަނީ ތައްޔާރުކޮށްފައެވެ. ސަހަރާއާއި މިސްކިތަށް އަންނަ ފަރާތްތަކަށް ޚާއްސަ ސައިކަލް ޕާކިންގ ޒޯނެއްވެސް ވަނީ ހަދާފައެވެ.
މި މަޝްރޫޢުގެ ޖުމްލަ އަގަކީ 11.6 މިލިއަން ރުފިޔާއެވެ. މާލެ ސިޓީގެ ޑެޕިއުޓީ މޭޔަރ އާދަމް އާޒިމް ވިދާޅުވީ، ރައީސް މުޢިއްޒު ފެއްޓެވި މި މަސައްކަތް މިހާރުގެ މޭޔަރ ވަރަށް އިސްކަމެއް ދެއްވައިގެން ނިންމެވި ކަމަށެވެ. އަދި މިއަދުން ފެށިގެން މާލޭގެ އާސަހަރާގައި ކަށުކަމާކެމީގެ ކަންކަމާއި ވަޅުލުމުގެ ކަންކަން ކުރިއަށްދާނެ ކަމަށް އޭނާ ވިދާޅުވިއެވެ.
