އުތުރު މެރިޓައިމް ސަރވިސް (ޔޫއެމްއެސް)ގެ ޚިދުމަތް ތަޢާރަފުކުރުމާ ގުޅިގެން، މިއަދު ހެނދުނު އިހަވަންދިއްޕޮޅުގައި ފުރަތަމަ އުޅަނދު ބަނދަރުކޮށްފިއެވެ. "ޖިއަން ޖިއޭ" (JIAN JIE) ނަމަކަށް ކިޔާ މި ތެޔޮ ޓޭންކަރަކީ ޔޫއެމްއެސްގެ ދަށުން ތަޢާރަފުކުރެވުނު އެކި ޚިދުމަތްތައް ހޯދުމަށް އައި އުޅަނދެކެވެ.
މި އުޅަނދުގެ ކްރޫ ޗޭންޖްވާ ފަޅުވެރިން މިއަދު ހަވީރު އުލިގަމަށް ފައިބައި، އުލިގަމުގައި ހަދާފައިވާ "ސީމަންސް ރެސްޓް އޭރިޔާ" ރަސްމީކޮށް ހުޅުވުމުގެ ރަސްމިއްޔާތުގައި ބައިވެރިވިއެވެ. މި "ސީމަންސް ރެސްޓް އޭރިޔާ" އަކީ އެމް.ޕީ.އެލް އިން އުލިގަމުގައި ޤާއިމްކޮށްފައިވާ އިންޓަނޭޝަނަލް ޝިޕް އެންޑު ޕޯޓު ސެކިއުރިޓީ (އައިއެސްޕީއެސް) ގޭޓުން އެތެރެވާ އުޅަނދުފަހަރުގެ ފަޅުވެރިންނަށް ޚާއްޞަކޮށް ތައްޔާރުކޮށްފައިވާ ތަނެކެވެ. މި ތަނުގައި ފަޅުވެރިންނަށް މަޑުކޮށް، އަރާމުކޮށްލައި އަދި ބައެއް ކުޅިވަރުތައް ކުޅެވޭނެއެވެ.
"ޖިއަން ޖިއޭ" އުޅަނދުން ވަނީ ޔޫއެމްއެސްގެ ޚިދުމަތުގެ ދަށުން ކްރޫ ޗޭންޖްގެ ޚިދުމަތާއި، ފެނާއި ސަޕްލައި، ކުނި ނައްތާލުން އަދި ބައެއް ސްޕެއަރ ޕާޓްސް ހޯދުމަށް އެދިފައެވެ. އަދި މެއިންޓަނަންސްގެ ބައެއް މަސައްކަތްތައް ކުރަންޖެހޭތީ، މި އުޅަނދު ފަސް ދުވަހެއްހާ ދުވަހު އިހަވަންދިއްޕޮޅުގައި މަޑުކުރާނެ ކަމަށް ލަފާކުރެވެއެވެ.
އެމްޕީއެލްގެ ސީއީއޯ މުޙައްމަދު ވަޖީހް ވިދާޅުވި ގޮތުގައި، މި ބޯޓު އިހަވަންދިއްޕޮޅުގައި މަޑުކުރާ މުއްދަތުގައި އެ ސަރަހައްދުގެ ރައްޔިތުންނަށް ވިޔަފާރީގެ އިތުރު ފުރުސަތުތަކެއް ހުޅުވިގެންދާނެއެވެ. އަދި މިއީ މެރިޓައިމް ދާއިރާގެ ތަރައްޤީއަށް އެޅުނު މުހިންމު ފިޔަވަޅެއް ކަމުގައި އޭނާ ފާހަގަކުރެއްވިއެވެ.
