ރާއްޖޭގެ ކުރިއަށް އޮތް 20 އަހަރުގެ ތަރައްގީގެ ޕްލޭން އެކުލަވާލުމަށް އެހީތެރިކަން ފޯރުކޮށްދިނުމަށް ރާއްޖެއާއި އޮސްޓްރޭލިއާއާ ދެމެދު މިއަދު ފަހުމުނާމާއެއްގައި ސޮއިކުރެވުނެވެ.
ހައުސިން މިނިސްޓްރީގައި ބޭއްވުނު ރަސްމިއްޔާތުގައި، ރާއްޖޭގެ ފަރާތުން ހައުސިން މިނިސްޓަރު ޑރ. އަލީ ހައިދަރު އަދި އޮސްޓްރޭލިއާގެ ފަރާތުން އެ ގައުމުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ޑޭވިޑް ޖޭސަފް މި އެއްބަސްވުމުގައި ސޮއިކުރެއްވިއެވެ.
މިނިސްޓަރު ހައިދަރު ވިދާޅުވި ގޮތުގައި، މި ޕްލޭން އެކުލަވާލުމަށް މަޢުލޫމާތު އެއްކުރެވޭނީ އެއްވެސް ފަރާތެއް ބާކީ ނުވާ ގޮތަށެވެ. އަދި މަޢުލޫމާތު އެއްކުރުމާއި ދިރާސާކުރުން މުޅި ރާއްޖޭގެ އެކި ކަންކޮޅުތަކުގައި ކުރިއަށްދާނެ ކަމަށް އެމަނިކުފާނު ފާހަގަކުރެއްވިއެވެ. މިއާއެކު، ރައްޔިތުން އެދޭފަދަ ދިވެހިރާއްޖެއެއް ހޯދުން ޙަޤީޤަތަކަށް ހެދުމަށް މަސައްކަތްކުރާނެ ކަމުގެ ޔަޤީންކަން ވެސް އެމަނިކުފާނު ދެއްވިއެވެ. އަދި ރާއްޖޭގެ ތަރައްޤީއަށް ކުރެވޭ މި ފަދަ މުހިންމު މަސައްކަތްތަކަށް އެހީތެރިކަން ފޯރުކޮށްދޭތީ އޮސްޓްރޭލިއާ ސަރުކާރަށް ޝުކުރު އަދާކުރެއްވިއެވެ.
މި އެއްބަސްވުމުގެ ދަށުން، އޮސްޓްރޭލިއާ ސަރުކާރުން ވަނީ 90,000 އޮސްޓްރޭލިއަން ޑޮލަރު ނުވަތަ 9.4 މިލިއަން ރުފިޔާ ރާއްޖޭގެ ކުރިއަށް އޮތް 20 އަހަރުގެ ތަރައްޤީގެ ޕްލޭން އެކުލަވާލުމަށް އެހީގެ ގޮތުގައި ދެއްވާފައެވެ. ސަފީރު ޑޭވިޑް ވިދާޅުވި ގޮތުގައި، މި ޕްލޭން އެކުލަވާލުމަށް އޮސްޓްރޭލިއާއިން ހުރިހާ ގޮތަކުން އެހީތެރިކަން ފޯރުކޮށްދޭނެއެވެ. މީގެ ތެރޭގައި ފަންނީ ލަފާ ދިނުމާއި، އިޤްތިޞާދު، ތިމާވެށި، އިޖުތިމާޢީ އަދި ސްޕޭޝަލް ޕްލޭނިންގގެ ދާއިރާއިން އެހީތެރިކަން ހިމެނެއެވެ.
ފާއިތުވި މަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ކުރިއަށް އޮތް 20 އަހަރުގެ ތަރައްޤީގެ ޕްލޭން އެކުލަވާލުމަށް ނިންމި ކަން އިޢުލާނު ކުރައްވާފައެވެ. މި އެއްބަސްވުމަކީ އެ ނިންމެވުމާ ގުޅިގެން އެޅުނު މުހިންމު ފިޔަވަޅެކެވެ.
