ސިވިލް ސަރވިސް ކޮމިޝަނުން މާލެ ސިޓީ އަދި އައްޑޫ ސިޓީ ކައުންސިލްތަކުގެ ސެކްރެޓަރީ ޖެނެރަލްގެ މަޤާމަށް މީހުން ހޯދުމަށް އިޢުލާނުކޮށްފިއެވެ. މި މަޤާމަށް އައްޔަންކުރެވޭ ފަރާތްތައް ފަސް އަހަރުގެ މުއްދަތަކަށް ޚިދުމަތްކުރާނެއެވެ. މުސާރައިގެ ގޮތުގައި މަހަކު 20,500 ރުފިޔާ އަދި އެގްޒެކެޓިވް އެލަވަންސްގެ ގޮތުގައި 15,000 ރުފިޔާ ލިބޭނެއެވެ. މީގެ އިތުރުން، ސިވިލް ސަރވިސްގެ މުވައްޒަފުންނަށް ލިބިދެވޭ ބޭސްފަރުވާގެ ޚިދުމަތާއި ޕެންޝަން ކޮންޓްރިބިއުޝަން ވެސް ލިބޭނެއެވެ.
ސެކްރެޓަރީ ޖެނެރަލްގެ މަޤާމަކީ ކައުންސިލްގެ އިދާރާގެ އިދާރީ ހިންގުމުގެ އެންމެ އިސް މަޤާމު ކަމަށްވުމާއެކު، މި މަޤާމަށް އިތުރުގަޑީގެ ފައިސާ ނުލިބޭނެކަން ފާހަގަކޮށްފައިވެއެވެ. ކައުންސިލްގެ ލަފާގެ މަތިން، އިދާރާގެ އެންމެހައި އިދާރީ ކަންކަން ހިންގައި ބެލެހެއްޓުމާއި މާލީ ޒިންމާދާރުވެރިޔާގެ މަސްއޫލިއްޔަތު އުފުލުމަކީ ސެކްރެޓަރީ ޖެނެރަލްގެ ޒިންމާއެކެވެ.
މި މަޤާމުތަކަށް ކުރިމަތިލާން ޝައުޤުވެރިވާ ފަރާތްތަކުން، ބޭނުންވާ ލިޔެކިޔުންތައް މި މަހުގެ ދިހަވަނަ ދުވަހުގެ މެންދުރުފަހު 2:00 ގެ ކުރިން ސިވިލް ސަރވިސް ކޮމިޝަނުގެ އިދާރާއަށް ހުށަހަޅަންވާނެއެވެ.
