ބައިނަލް އަގުވާމީ ދެމެހެއްޓެނިވި ސުލްހައަށްޓަކާ، އެންމެންގެ އަޑުވެސް އެހުން މުހިންމުކަމުގައި، ޔޫއެން ޖެނެރަލް އެސެމްބްލީގެ ކުރީގެ ރައީސް، އަދި މިހާރުގެ އެމްޑީޕީގެ ރައީސް އަބުދުﷲ ޝާހިދު ވިދާޅުވެއްޖެއެވެ.
މިހާރު ޔޫއެންއަށް ކުރައްވަމުން ގެންދަވާ ދަތުރުފުޅުގައި، ޔޫއެންގެ ޑެޕިއުޓީ ސެކެޓްރީ ޖެނެރަލް އަމީނާ ޖ. މުހައްމަދުއާއި ބައްދަލު ކުރެއްވުމަށްފަހު ކުރެއްވި އެކްސް ޕޯސްޓެއްގައި ޝާހިދު ވިދާޅުވީ އެނބުރި ޔޫއެންއަށް ވަޑައިގެންނެވުމަކީ ލިބޭ ވަރަށްބޮޑު އުފަލެއް ކަމަށާއި، ބައިނަލްއަގުވާމީ ސުލްހައާއި އެއްބައިވަންތަކަން ދެމެހެއްޓުމަށް، ޑީޕްލޮމަސީ ކުރިއެރުވުމަށްޓަކާ ބައިނަލްއަގުވާމީ ޖަމިއްޔާ ޖަމާއަތްތަކާއެކު މަސައްކަތް ކުރުމުގެ ފުރުސަތު ލިބުމަކީ ލިބޭ ވަރަށްބޮޑު އުފަލެއް ކަމުގައެވެ.
އަދި ދުނިޔޭގެ ސުލްހައާއި އެއްބައިވަންތަކަން ކުރިއެރުވުމަށް "ޓްރެކް 1.5 ޑިޕްލޮމަސީ"ގެ މުހިންމު ދައުރު އިތުރަށް ކުރިއެރުވުމުގައި ކުރެވެމުންދާ މަސައްކަތްތަކާ ބެހޭގޮތުން ޑެޕިއުޓީ ސެކްރެޓަރީ-ޖެނެރަލް އަމީނާ ޖ. މުހައްމަދަށް މަޢުލޫމާތު ދިނުމަކީ ލިބިބަޑައިގެންނެވި ވަރަށްބޮޑު ޝަރަފެއްކަމުގައިވެސް ޝާހިދު ވިދާޅުވެފައި ވެއެވެ.
އެކުގައި ކުރެވެމުންދާ މަސައްކަތަކީ ރަސްމީ ޑިޕްލޮމަސީއާއި ނުރަސްމީ މުޢާމަލާތުގެ ދެމެދުގައިވާ ފަރަގު ކުޑަކުރުމުގެ މަސައްކަތް. އަދި ދުނިޔެއަށް ދެމެެހެއްޓެނިވި ސުލްހައެއް ގެނައުމުގައި ހުރިހާ އަޑުތަކެއް އިވޭކަން ކަށަވަރުކުރަންޖެހޭ.
ޝާހިދު ވިދާޅުވެފައި ވެއެވެ.
ޝާހިދު މިހާރު ޔޫއެންއަށް ކުރައްވަމުން ގެންދަވާ ދަތުރުފުޅުގައި، ޔޫއެން ޑެޕިއުޓީ ސެކެޓްރީ ޖެނެރަލްގެ އިތުރުން ބައެއް ޖަމިއްޔާތަކާއި އަދި ބައެއް ގައުމުތަކުގެ އިސް އެހެން ބައެއް ޑިޕްލޮމޭޓުންނާވެސް ބައްދަލުކުރުމަށް ވަނީ ހަމަޖެހިފައެވެ. އޭގެ ތެރެގައި ސީޝަލްގެ ސަފީރުއާއި، މޮރޮކޯގެ ސަފީރުއާއި، އޮސްޓްރޭލިއާގެ އެމްބެސެޑަރއާއި އަދި ޔޫއެންގެ އިކޮނޮމިކް އަދި ސޯޝަލް ކައުންސިލް (އިކޯސޮކް) ރައީސާއި ބައްދަލު ކުރެއްވުމަށް ވަނީ ހަމަޖެހިފައެވެ. އޭގެ އިތުރުން ކެނެޑާގެ ސަފީރުއާއިވެސް ޝާހިދު ބައްދަލު ކުރެއްވުމަށް ވަނީ ހަމަޖެހިފައެވެ.
ރާއްޖޭގެ ކުރީގެ ޚާރިޖީ ވަޒީރު އަބުދުﷲ ޝާހިދު ޔޫއެންގެ ޖެނެރަލް އެސެމްބްލީގެ 76 ވަނަ ދައުރުގެ ރިޔާސަތު ކާމިޔާބު ކުރައްވާފައިވަނީ 2021 އަހަރުގެ ޖޫން މަހުގެ 7 ވަނަ ދުވަހު ބޭއްވުނު އިންތިޚާބު 193 ގައުމު އެކުލެވޭ އާންމު މަޖިލިހުގެ 143 ގައުމުގެ ބޮޑު އަޢުލަބިއްޔަތެއް ހޯއްދަވައިގެންނެވެ.
2021 ސެޕްޓެމްބަރު 14 ގައި ފެށުނު ޢާއްމު މަޖިލީހުގެ 76 ވަނަ ދައުރުގައި އޭޝިއާ ޕެސިފިކް ސަރަހައްދުގެ ފަރާތުން ރިޔާސަތު ބަލަހައްޓަން ފޮރިން މިނިސްޓަރ ޝާހިދު ނޮމިނޭޓްކުރެއްވީ ރާއްޖޭގެ އޭރުގެ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހްއެވެ. މިއީ އދގެ ޢާއްމު މަޖިލީހުގެ ރިޔާސަތަށް ދިވެހިރާއްޖެއިން ކުރިމަތިލި ފުރަތަމަ ފަހަރެވެ. އަދި ދިވެހިރާއްޖެ ވެގެން މިދިޔައީ ތަރައްޤީވަމުން އަންނަ ކުދި ޖަޒީރާ ޤައުމުތަކުގެ ތެރެއިން އދގެ ރިޔާސަތު ބެލެެހެއްޓި 6 ވަނަ ގައުމު ކަމުގައެވެ.
ޔޫއެންގެ ޖެނެރަލް އެސެމްބްލީގެ 76 ވަނަ ދައުރުގެ ރިޔާސަތަށް ޝާހިދު ވަޑައިގެންނެވީ، މައިގަޑު 5 އަމާޒެއް ހާސިލް ކުރެއްވުމަށް މަސައްކަތް ކުރައްވާނެކަމަށް، އޭރު ކުރެއްވި ކެމްޕޭނުގައި ވަދުވެ ވަޑައިގަތުމަށްފަހުއެވެ. އަދި އެއްއަހަރުގެ ދައުރުގައި އާންމު މަޖިލިހުގެ ރައީސްކަން ކުރައްވާފައިވަނީ "ޕްރެސިޑެންސީ އޮފް ހޯޕް" (އުއްމީދީ ރިޔާސަތު) މި ޝިއާރުގެ ދަށުންނެވެ.
އެއް އަހަރުގެ ދައުރު މިމަހުގެ ހަމަވެގެން ދިޔައިރު، ޝާހިދު ވަނީ ޔޫއެންޖީއޭގެ ރައީސްގެ ހައިސިއްޔަތުން ދުނިޔޭގެ އެކި ގައުމުތަކަށް ދަތުރު ކުރައްވާފައެވެ.
