އެންޓި-ކޮރަޕްޝަން ކޮމިޝަން (އޭސީސީ) އާއި ހޮންކޮންގެ އިންޑިޕެންޑެންޓް ކޮމިޝަން އަގެއިންސްޓް ކޮރަޕްޝަން (އައިސީއޭސީ) އާ ދެމެދު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ސޮއިކުރެވުނީ މިދިޔަ މަހުގެ 10 ވަނަ ދުވަހު ހޮންކޮންގެ އައިސީއޭސީގެ މައި އިދާރާގައެވެ. އޭސީސީގެ ފަރާތުން މި ފަހުމުނާމާގައި ސޮއިކުރެއްވީ ކޮމިޝަނުގެ ރައީސް އާދަމް ޝާމިލް އަދި އައިސީއޭސީގެ ފަރާތުން ސޮއިކުރެއްވީ އެ ކޮމިޝަނުގެ ކޮމިޝަނަރ، ޑެނީ ޔެންގ މިންގ ވޫއެވެ.
ހޮންކޮންގެ އައިސީއޭސީއަކީ ކޮރަޕްޝަނާއި މަނީ ލޯންޑްރިންގ ތަޙުޤީޤުކުރުމާއި ހުއްޓުވުމުގެ އިތުރުން ކޮރަޕްޝަނާ ދެކޮޅަށް މުވައްޒަފުން ބިނާކުރުމުގައި ސަރަހައްދީ އަދި ބައިނަލްއަޤްވާމީ ފެންވަރުގައި ފާހަގަކުރެވޭ މުއައްސަސާއެކެވެ.
އޭސީސީން މަޢުލޫމާތު ދީފައިވާ ގޮތުގައި މި ފަހުމުނާމާގެ ދަށުން ކުރިއަށް ގެންދާ މައިގަނޑު މަސައްކަތްތަކުގެ ތެރޭގައި ކޮރަޕްޝަނާއި މަނީ ލޯންޑްރިންގ ތަޙުޤީޤުތަކާ ގުޅޭ މަޢުލޫމާތު ބަދަލުކުރުމާއި، މި ކުށްތަކުގެ ސަބަބުން ގެއްލޭ މުދަލާއި ފައިސާ ހޯދައި އަނބުރާ ހޯދުމުގައި ގުޅިގެން މަސައްކަތްކުރުން ހިމެނެއެވެ. މީގެ އިތުރުން، ކުށްކުރާ ގޮތްތައް ދެނެގަތުމުގައި އެހީތެރިކަމާއި އެއްބާރުލުން ދިނުމާއި، އެފަދަ ކުށްތައް ހުއްޓުވުމަށް މަސައްކަތްކުރުމަށް ވެސް އެއްބަސްވެފައިވެއެވެ.
އެއްބަސްވުމުގެ ދަށުން ދެ ފަރާތުން ގުޅިގެން ކުރާނެ އިތުރު މަސައްކަތްތަކުގެ ތެރޭގައި މުވައްޒަފުން ތަމްރީނުކުރުމާއި، ކޮރަޕްޝަނާއި މަނީ ލޯންޑްރިންގ ހުއްޓުވުމާ ގުޅޭ ފޯރަމްތަކާއި، ސެމިނަރތަކާއި، ކޮންފަރެންސްތަކާއި ވަރކްޝޮޕްތައް ބޭއްވުމާއި އެފަދަ ހަރަކާތްތަކުގައި ބައިވެރިވުން ހިމެނެއެވެ. އަދި މި ދާއިރާގައި އެންމެ ރަނގަޅު އުސޫލުތަކުގެ މަޢުލޫމާތު ޙިއްޞާކުރުމާއި، ދިރާސާތައް ކުރުމާއި، މުޖުތަމަޢުގެ ނަޒާހަތްތެރިކަން އިތުރުކުރުމަށް މަސައްކަތްކުރުން ވެސް ހިމެނެއެވެ.
