މަރުކަޒީ ބޭންކު، އެމްއެމްއޭގެ ގަވަރުނަރު އަޙުމަދު މުނައްވަރު ވިދާޅުވެފައިވަނީ ރާއްޖެއަށް ވަންނަ ބޭރު ފައިސާއާއި ފައިސާ މާރުކުރުމުގެ ވިޔަފާރިއާ ބެހޭ އައު ގަވާއިދުތަކުގެ ސަބަބުން ފަތުރުވެރިކަމުގެ ދާއިރާގައި ރުފިޔާގެ ޑިމާންޑު އިތުރުވާނެ ކަމަށެވެ.
ދައުލަތުގެ މީޑިޔާ ޕީއެސްއެމްގެ ޕްރޮގުރާމެއްގައި ވާހަކަފުޅު ދައްކަވަމުން ގަވަރުނަރު ވިދާޅުވީ މި ގަވާއިދުތަކުގެ މަޤްޞަދަކީ ރާއްޖޭގެ ބޭންކިންގ ނިޒާމަށް ވަންނަ ޑޮލަރުގެ އަދަދު އިތުރުކުރުން ކަމަށެވެ.
ގަވަރުނަރު މުނައްވަރު ފާހަގަކުރެއްވި ގޮތުގައި މިހާރު ފަތުރުވެރިކަމުގެ ސިނާޢަތުން ބޭންކިންގ ނިޒާމަށް ވަންނަނީ އެންމެ 3 އިންސައްތަ ޑޮލަރެވެ. ނަމަވެސް އައު ގަވާއިދުގެ ދަށުން ބޭންކިންގ ނިޒާމަށް ވަންނަ ޑޮލަރުގެ އަދަދު އިތުރުވެ، ދިވެހި ރުފިޔާއަށް އޮންނަ ޑިމާންޑު އިތުރުވާނެއެވެ. މިހާރު އެމްއެމްއޭއަށް މާރުވާ ފައިސާއިން ބޭންކިންގ ނިޒާމަށް އަހަރަކު ދެވެނީ 300 ނުވަތަ 400 މިލިއަން ޑޮލަރު ކަމަށް ވިދާޅުވިއެވެ. އެހެންނަމަވެސް އައު ގަވާއިދުގެ ދަށުން އަހަރަކު އެމްއެމްއޭއިން ބޭންކުތަކަށް ދޫކުރާ ޑޮލަރުގެ އަދަދު ދެގުނަ އިތުރުވާނެ ކަމަށް ގަވަރުނަރު ލަފާކުރެއްވިއެވެ.
ގަވަރުނަރު މުނައްވަރު އިތުރަށް ވިދާޅުވީ އެމްއެމްއޭއަށް ބޭރުފައިސާ ނެގުމުން، އެ ފައިސާ އަނބުރާ ބޭންކުތަކަށް ބޭނުންވާ ބޭރުފައިސާ ހަމަޖެއްސުމަށް ދިނުމުން، ޑޮލަރު ލިބުމުގައި މިހާރު ދިމާވާ ދަތިތަކަށް ޙައްލެއް ލިބޭނެ ކަމަށެވެ. އައު ގަވާއިދުގެ ދަށުން ރާއްޖެ އަންނަ ކޮންމެ ފަތުރުވެރިއެއްގެ ބޮލަކަށް ދިވެހިރާއްޖޭގެ ބޭންކަކަށް ޑޮލަރު މާރުކުރަން ޖެހެއެވެ. ރިސޯޓުތަކަށް އަންނަ ކޮންމެ ފަތުރުވެރިއަކަށް 500 ޑޮލަރު އަދި ރަށްރަށުގެ ގެސްޓްހައުސްތަކަށް އަންނަ ކޮންމެ ފަތުރުވެރިއަކަށް 25 ޑޮލަރު ބޭންކަށް މާރުކުރަންޖެހޭނެ ކަމަށް އައު ގަވާއިދުގައި ބަޔާންކޮށްފައިވެއެވެ.
ކޮމެންޓު ފޮނުވާ