ހުޅުމާލޭ ތިންވަނަ ފިޔަވަހީގައި ގަވާއިދާ ޚިލާފަށް ބަހައްޓާފައި ހުރި ތަކެތި ނެގުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އަލުން އަންގައިފިއެވެ.

މިއީ މިދިޔަ މެއި މަހުގެ އަށެއްގައި ވެސް އެޗްޑީސީން ކުރި އިޢުލާނެއްގެ ތަކުރާރެކެވެ. އޭރު އެ އިޢުލާނު ކުރީ ހުޅުމާލޭ ދެވަނަ ފިޔަވަހީގެ ޗެނަލް ޕްރޮޖެކްޓް 02 ފެށުމަށް ހަމަޖެހިފައިވާ ސަރަހައްދު ހުސްކުރުމަށެވެ. ނަމަވެސް، ގިނަ ފަރާތްތަކުން އެކަމަށް އިޖާބަދީފައިނުވާ ކަމަށް އެޗްޑީސީން ބުނެފައިވެއެވެ.

އެޗްޑީސީން ފާހަގަކޮށްފައިވާ ގޮތުގައި، ހުޅުމާލޭ ތިންވަނަ ފިޔަވަހީގެ ހުސް ބިންތަކުގައި ގަވާއިދާ ޚިލާފަށް މުދަލާއި ތަކެތި ބަހައްޓައި، ބައެއް ފަރާތްތަކުން އަދިވެސް އެ ބިންތައް ބޭނުންކުރަމުން ގެންދެއެވެ. އެހެންކަމުން، މި ތަކެތި މި މަހުގެ 11 ވަނަ ދުވަހުގެ ކުރިން ނެގުމަށް އެޗްޑީސީން އަންގާފައިވެއެވެ. އަދި މި މުއްދަތުގެ ތެރޭގައި އެ ތަކެތި ނުނަގައިފިނަމަ، އެއީ ވެރިފަރާތްތަކުން ބޭނުން ނެތިގެން ދޫކޮށްލާފައިވާ ތަކެތި ކަމުގައި ބަލައި، އެ ކޯޕަރޭޝަނުން އެފަދަ ތަކެއްޗާމެދު ޢަމަލުކުރުމަށް ހަމަޖެހިފައިވާ ގޮތުގެ މަތިން ޢަމަލުކުރާނެ ކަމަށް ބުނެފައިވެއެވެ.

އެޗްޑީސީން އިތުރަށް ފާހަގަކޮށްފައިވަނީ، މި މަސައްކަތުގެ ތެރޭގައި މުދަލަށް ނުވަތަ ތަކެއްޗަށް ލިބިދާނެ ގެއްލުމަކަށް އެ ކޯޕަރޭޝަނުން ޒިންމާ ނުވާނެ ކަމަށެވެ. ހުޅުމާލޭ ތިންވަނަ ފިޔަވަހި ހިއްކުމުގެ މަސައްކަތްތައް ކުރިއަށްދާއިރު، ކުރީގެ ސަރުކާރުން މި ބިން ބޭނުންކުރަން ރާވާފައިވަނީ މާލޭ ރައްޔިތުންނަށް ގޯތި ދިނުމަށެވެ.