ނޭޕާލުގައި މިހާރު ކުރަމުންދާ މޫސުމީ ވިއްސާރައިގެ ސަބަބުން ފެންބޮޑުވެ، ގިނަ ބަޔަކު މަރުވެފައިވާތީ އެކަމުގެ ހިތާމާގައި ރައީސް ޑރ. މުޙައްމަދު މުޢިއްޒު އެ ޤައުމުގެ ބޮޑުވަޒީރު ކޭޕީ ޝަރްމާ އޮލީއަށް ހަމްދަރުދީގެ މެސެޖެއް ފޮނުއްވާފައެވެ.
ހުކުރު ދުވަހުން ފެށިގެން ނޭޕާލުގެ އިރުމަތީ އަދި މެދުތެރޭގެ ބޮޑު ސަރަޙައްދެއްގައި ފެންބޮޑުވެ، ބައެއް ކޯރުތަކުގައި ފެންއުފުރި، އެ ޤައުމުގެ ހައިވޭތަކަށް ބޮޑެތި ގެއްލުންތަކެއް ވަނީ ލިބިފައެވެ. އެ ޤައުމުގެ މޫސުމާބެހޭ ޤައުމީ އިދާރާއިން ހާމަކުރި ގޮތުގައި ކަތުމަންޑޫ ވާދީއަށް ހޮނިހިރު ދުވަހުގެ ހެނދުނުގެ ނިޔަލަށް 240 މިލިމީޓަރުގެ ވާރޭ ވެހިފައިވެއެވެ. މި ވިއްސާރައާ ގުޅިގެން މަރުވި މީހުންގެ އަދަދު 200 އަށް އަރާފައިވާއިރު، 28 މީހުން ވަނީ ގެއްލިފައެވެ.
މި ހާދިސާއާ ގުޅިގެން ރައީސް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ނޭޕާލުގައި ފެންބޮޑުވެ ބިންގަނޑު ކަނޑައިގެން ދިއުމުގެ ސަބަބުން އެތައް ބައެއްގެ ފުރާނަ ގެއްލި، އެތައް ބަޔަކަށް އަނިޔާވެފައިވާތީ އެކަމާ ހިތާމަކުރައްވާ ކަމަށެވެ. އަދި ބޮޑުވަޒީރާއި މި ހާދިސާގައި މަރުވި މީހުންގެ ޢާއިލާތަކަށް ހަމްދަރުދީ ފާޅުކުރައްވާފައިވެއެވެ. ރައީސް އެދިވަޑައިގެންފައިވަނީ ޒަޚަމްވި މީހުންނަށް އަވަސް ޝިފާއެއް ލިބި، ގެއްލުނު މީހުން ފެނުމުގެ އުއްމީދަށެވެ. އަދި މި އުނދަގޫ ބޮޑު ދަނޑިވަޅުގައި، ރާއްޖެ އޮތީ އަވަށްޓެރި ނޭޕާލާއެކުގައި ކަމަށް ވިދާޅުވެފައިވެއެވެ.
