އިޒްރޭލުން ފަލަސްތީނުގައި ހިންގަމުންދާ އަމަލުތަކަކީ ނަސްލު ނައްތާލުމުގެ އަމަލުތަކެއް ކަމަށް ބުނެ ސައުތު އެފްރިކާއިން އިންޓަނޭޝަނަލް ކޯޓު އޮފް ޖަސްޓިސް (އައިސީޖޭ) އަށް ހުށަހަޅާފައިވާ މައްސަލައަށް ތަދައްހުލުވުމަށް ދިވެހިރާއްޖެއިން މިއަދު "ޑެކްލެރޭޝަން އޮފް އިންޓަވެންޝަން" ހުށަހަޅައިފިއެވެ. މި ލިޔުން ހުށަހެޅީ މި މައްސަލައަށް ރާއްޖެއިން ކަނޑައަޅާފައިވާ އޭޖެންޓް، ބަންޑާރަނައިބު އަހްމަދު އުޝާމްގެ ފަރާތުންނެވެ.
މި މައްސަލައަކީ ދެކުނު އެފްރިކާއިން 2023 ވަނަ އަހަރުގެ ޑިސެންބަރު 29 ވަނަ ދުވަހު ހުށަހެޅި މައްސަލައެކެވެ. އޭގައި ބުނެފައިވަނީ އިޒްރޭލުން ގައްޒާގައި ހިންގަމުންދާ އަމަލުތަކަކީ 1948 ވަނަ އަހަރުގެ ޖެނޮސައިޑް ކޮންވެންޝަނާ ޚިލާފު އަމަލުތަކެއް ކަމަށެވެ. ރާއްޖެއިން ހުށަހެޅި އިންޓަވެންޝަން އަމާޒުކޮށްފައިވަނީ ޖެނޮސައިޑް ކޮންވެންޝަންގެ ދަށުން "އިންސައިޓްމަންޓް ޓު ކޮމިޓް ޖެނޮސައިޑް" އަދި "ޑިއުޓީ ޓު ޕަނިޝް ދަ އިންސައިޓްމަންޓް އޮފް ޖެނޮސައިޑް" މާނަކުރެވިފައިވާ ގޮތާ ގުޅޭގޮތުންނެވެ.
ދިވެހި ސަރުކާރުން ދަނީ އިޒްރޭލުން ފަލަސްތީނުގައި ހިންގަމުންދާ އަމަލުތަކަކީ ޖެނޮސައިޑް އަދި އެޕާތައިޑްގެ އަމަލުތަކެއްކަމަށާއި، އެއީ ބައިނަލްއަޤްވާމީ ޤާނޫނުތަކާ ޚިލާފު ޖަރީމާތަކެއްކަމަށް ބައިނަލްއަޤްވާމީ މައިދާންތަކުގައި ވަކާލާތުކުރަމުންނެވެ. މިގޮތުން، އދ. ގެ ޢާންމު މަޖިލީހުގެ 79 ވަނަ ސެޝަންގައި ރައީސް ޑރ. މުޙައްމަދު މުޢިއްޒު ވަނީ ގައްޒާގައި އިޒްރޭލުން ހިންގަމުންދާ އަމަލުތަކަކީ އިންސާފާއި ބައިނަލްއަޤްވާމީ ނިޒާމަށް ކުރެވޭ މަލާމާތެއްކަމަށް ވިދާޅުވެފައެވެ.
ދިވެހި ސަރުކާރުން ގޮވާލަނީ އިޒްރޭލުން ފަލަސްތީނުގައި ހިންގަމުންދާ ނަސްލުހޭދުގެ އަމަލުތައް ވަގުތުން އަދި ދާއިމީކޮށް ހުއްޓާލުމަށެވެ. އަދި 1967 ވަނަ އަހަރުގެ ކުރީގެ ސަރަހައްދީ އިންތަކުގެ މައްޗަށް ބިނާކޮށް، އިރުމަތީ ޤުދުސް ވެރިރަށެއްގެ ގޮތުގައި ކަނޑައަޅައި، މިނިވަން، މުސްތަޤިއްލު އަދި އަމިއްލަ ސިޔާދަތީ ބާރު ހިނގާ ފަލަސްތީނުގެ ދައުލަތެއް ޤާއިމުކުރުމަށް ފަލަސްތީނުގެ ރައްޔިތުން ކުރާ މަސައްކަތަށް ދިވެހިރާއްޖެއިން ސާބިތުކަމާއެކު އެއްބާރުލުން ދޭނެކަމުގެ ޔަޤީންކަން ދީފައިވެއެވެ.
