ހަޔާ އެޑިއުކޭޝަން މިނިސްޓްރީން ހާމަކޮށްފައިވާ ގޮތުގައި މިއަހަރުގެ އޮގަސްޓް މަހުގެ ނިޔަލަށް ޖުމްލަ 13,866 ދަރިވަރުންނަށް ސްޓޫޑަންޓް ލޯންގެ ގޮތުގައި މާލީ އެހީ ފޯރުކޮށްދީފިއެވެ.
މި އެހީގެ ތެރޭގައި ފުރަތަމަ ޑިގްރީ، ސްކޮލަޝިޕް ސްކީމް އަދި ސްޓޫޑަންޓް ލޯނު ސްކީމް ހިމެނެއެވެ. މި ދަރިވަރުންގެ މަތީ ތަޢުލީމާއި ތަމްރީނަށް ޖުމްލަ 689,663,352 ރުފިޔާ ޚަރަދުކުރެވިފައިވާ ކަމަށް މިނިސްޓްރީން ބުނެފައިވެއެވެ.
މިނިސްޓްރީން އިތުރަށް ފާހަގަކޮށްފައިވަނީ މި ސްކީމްތަކުގެ އިތުރުންވެސް ރާއްޖޭގެ ދަރިވަރުންނަށް މަތީ ތަޢުލީމުގެ ފުރުސަތުތައް ފަހިކޮށްދިނުމަށް އަމާޒުކޮށް ގިނަ މަސައްކަތްތަކެއް ކުރަމުންދާ ކަމަށެވެ. މީގެ ތެރޭގައި ޖަޕާނު، ތުރުކީ، މެލޭޝިޔާ، ޗައިނާ އަދި އިނގިރޭސިވިލާތް ފަދަ ޤައުމުތަކުގެ އެމްބަސީތަކާއި ޔުނިވަރސިޓީތަކުގެ އިސްބޭފުޅުންނާ ބައްދަލުކޮށް، އެކްސްޗޭންޖް ޕްރޮގްރާމްތަކާއި ސްކޮލަޝިޕް ފުރުސަތުތަކާ ގުޅޭ އެއްބަސްވުންތަކުގައި ސޮއިކުރަމުންދާ ކަމަށް ބުނެފައިވެއެވެ.
ރައީސް ޑރ. މުޙައްމަދު މުޢިއްޒުގެ ވަޢުދުފުޅެއްގެ ގޮތުގައި، ރާއްޖޭގެ ތަރައްޤީއަށް ބޭނުންވާ ހުނަރުވެރި ޒުވާނުން ބިނާކޮށް، ތަފާތު އެކި ދާއިރާތަކުގައި ވަޒީފާ އަދާކުރުމުގެ ފުރުސަތު ހޯދައިދިނުން ހިމެނެއެވެ. މި ސިޔާސަތުގެ ދަށުން، މަތީ ތަޢުލީމު ޙާޞިލުކުރުމަށް ބޭނުންވާ މާލީ އެހީ ފޯރުކޮށްދިނުމާއި، މަސައްކަތްތެރިކަމުގެ ދާއިރާތަކުން ޒުވާނުން ތަމްރީނުކުރުމުގެ ގިނަ މަސައްކަތްތަކެއް މިނިސްޓްރީން ކުރިއަށް ގެންދާ ކަމަށް ބުނެފައިވެއެވެ.
މީގެ އިތުރުން، ބޭރު ޤައުމުތަކުގެ އެމްބަސީތަކާއި ޔުނިވަރސިޓީތަކާ ބައްދަލުކޮށް، ދިވެހި ދަރިވަރުންނަށް މަތީ ތަޢުލީމުގެ ފުރުސަތުތައް ފަހިކޮށްދިނުމަށް ކުރެވެން ހުރި ކަންކަން ދެނެގަނެ، އެ ކަންކަމާ މެދު މަޝްވަރާކުރަމުންދާ ކަމަށްވެސް ހަޔަރ އެޑިއުކޭޝަން މިނިސްޓްރީން ފާހަގަކޮށްފައިވެއެވެ.
