ފުލުހުން ހާމަކޮށްފައިވާ ގޮތުގައި މިއަހަރުގެ އޮގަސްޓް މަހާ އަޅާބަލާއިރު ސެޕްޓެމްބަރު މަހު ރާއްޖޭގައި ކުށްކުރުން ވަނީ މަދުވެފައެވެ. ފުލުހުންގެ ތަރުޖަމާނު އަދި އެސިސްޓަންޓް ކޮމިޝަނަރު އަހުމަދު ޝިފާން އެކްސްގައި ހިއްސާކުރެއްވި ޕޯސްޓެއްގައި ވިދާޅުވެފައިވަނީ ވައްކަމާއި ފޭރުމާއި ޖުމްލަ ކުށްތައް މަދުވެފައިވާކަން ތަފާސް ހިސާބުތަކުން ދައްކާ ކަމަށެވެ.
ޝިފާން ފާހަގަކުރައްވާފައިވާ ގޮތުގައި މި ބަދަލުތައް ފެންނަން ފަށާފައިވަނީ ސްޓްރެޓެޖިކް ޕްލޭންގެ ދަށުން ހިންގަމުން އަންނަ ލޯކަލް ފްރޮންޓްލައިން ޕޮލިސިންގައި އަލަށް ފެށި މަސައްކަތްތަކުގެ ސަބަބުންނެވެ. ތަފާސް ހިސާބުތަކުން ދައްކާ ގޮތުގައި ވައްކަމުގެ މައްސަލަތަކާއި، ޓްރެފިކް އެކްސިޑެންޓްތަކާއި، ފޭރުމުގެ މައްސަލަތައް ވަނީ އޮގަސްޓް މަހާ އަޅާބަލާއިރު ސެޕްޓެމްބަރު މަހު މަދުވެފައެވެ.
Statistics show a reduction in theft, robbery, and overall crime in the Maldives during September compared to August. The new initiatives in Local Frontline Policing, implemented under the Strategic Plan, are yielding positive results. pic.twitter.com/vLn41CPAUp
— Ahmed Shifan (@Shifan4040) October 1, 2024
މީގެ އިތުރުން، ގެވެށި އަނިޔާ، މަސްތުވާތަކެތީގެ މައްސަލަތައް، މާރާމާރީ، އަދި ޖިންސީ ގޯނާގެ މައްސަލަތައްވެސް ވަނީ މަދުވެފައެވެ. ހަމައެހެންމެ، ގެއްލުން ދިނުމުގެ މައްސަލަތަކާއި، ތަކެތި ގެއްލިގެން ހުށަހަޅާ މައްސަލަތަކާއި، ކައުންޓަރފީޓް އަދި ފޯޖަރީގެ މައްސަލަތައްވެސް ވަނީ މަދުވެފައިކަމަށް ފުލުހުން ވަނީ ފާހަގަކޮށްފައެވެ.
މި ތަފާސް ހިސާބުތަކުން ދައްކާ ގޮތުގައި ގިނަ ބާވަތްތަކުގެ ކުށްތައް ވަނީ އޮގަސްޓް މަހާ އަޅާބަލާއިރު ސެޕްޓެމްބަރު މަހު މަދުވެފައެވެ.
