މާލޭގައި ހުންނަ ކިންގް ސަލްމާން މިސްކިތުގެ އޭސީ މަރާމާތު ކުރުމުގެ މަސައްކަތް ފަށައިފިއެވެ.
ސަލްމާން މިސްކިތުގެ އޭސީ މަރާމާތު ކުރަން ޖެހުނީ މެއިންޓަނެންސް ނުކޮށް ގިނަ އަހަރުތަކެއް ވެގެން ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ ވިދާޅުވެފައެވެ. މެއިންޓަނެންސް ނުކުރާތީ ސަލްމާން މިސްކިތުގެ އޭސީ ސިސްޓަމް ބޮޑުބައެއް ހަލާކުވި ކަމަށް ވެސް ޝަހީމް ވިދާޅުވިއެވެ.
ޝަހީމް މިއަދު ވިދާޅުވީ، އެ މިސްކިތުގެ އޭސީ ސިސްޓަމް މަރާމާތު ކުރުމުގެ މަސައްކަތް މިއަދު ފަށާފައިވާ ކަމަށެވެ.
ކިންގް ސަލްމާން މިސްކިތަކީ ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލްއަޒީޒްގެ ހިލޭ އެހީގެ ދަށުން 300 މިލިއަން ރުފިޔާ ހަރަދުކޮށްފައި އެޅި މިސްކިތެކެވެ. ކިންގް ސަލްމާން މިސްކިތަކީ ނަމާދުކުރާ ބަޔާއެކު، އިސްލާމީ މަރުކަޒެއްގެ ކޮންސެޕްޓަށް ތަރައްޤީކޮށްފައިވާ މިސްކިތެކެވެ.
ދެހާސް ސަތާރަ ވަނަ އަހަރު ފެށި މި މަސައްކަތް މުޅިން ނިންމާލެވުނީ 2020 ގައެވެ. އަދި މިސްކިތް ވަގުތީގޮތުން ނަމާދުކުރުމަށް ހުޅުވާލީ އޭޕްރީލް 1، 2022 ގައެވެ.
