ދައުލަތުގެ މީޑިއާ ކަމުގައިވާ ޕަބްލިކް ސާވިސް މީޑިއާ (ޕީއެސްއެމް) އާ ގުޅޭ ހިޔާނާތުގެ މައްސަލައެއް މިދިޔަ ޖުލައި މަހުން ފެށިގެން ތަޙުޤީޤުކުރަމުންދާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން މިއަދު ނެރުނު ނޫސްބަޔާނެއްގައި ބުނެފިއެވެ.
މި މައްސަލައަކީ ޕީއެސްއެމުން ޑޮލަރު ގަތުމަށް ނެގި ފައިސާއާއި އާމްދަނީގެ ގޮތުގައި ބަލައިގަނެފައިވާ ފައިސާއާ ގުޅޭ މައްސަލައެއް ކަމަށް އޭސީސީން ހާމަކޮށްފައިވެއެވެ.
ޕީއެސްއެމްގެ ޚާއްޞަ އޮޑިޓް ރިޕޯޓު އޮޑިޓަރ ޖެނެރަލް އޮފީހުން މިދިޔަ ހުކުރު ދުވަހު އާންމުކުރިއެވެ. މި ރިޕޯޓުގައި ފާހަގަކޮށްފައިވާ ގޮތުގައި، 2020 އިން 2024 ވަނަ އަހަރުގެ އޭޕްރީލް މަހުގެ ނިޔަލަށް ޕީއެސްއެމްއިން ގެއްލިފައިވަނީ އެކައުންޓަށް ޖަމާކޮށްފައިވާ 4.6 މިލިއަން ރުފިޔާގެ އިތުރުން 2017 އިން 2024 ވަނަ އަހަރުގެ އޭޕްރީލަށް އާމްދަނީގެ ގޮތުގައި ލިބިފައިވާ ފައިސާގެ ތެރެއިން 4.3 މިލިއަން ރުފިޔާ އަދި ތިޖޫރީގައި ހުރި 190،000 ރުފިޔާއެވެ.
އޮޑިޓް ރިޕޯޓުގައި އިތުރަށް ބަޔާންކޮށްފައިވާ ގޮތުގައި، ޕީއެސްއެމްގެ ބޭންކު އެކައުންޓުން 2020 އަހަރުން ފެށިގެން މިއަހަރުގެ އެޕްރީލް މަހުގެ ނިޔަލަށް 373،988 ޑޮލަރު ގަތުމަށް 5.8 މިލިއަން ރުފިޔާ ނަގައިފައިވެއެވެ. މީގެ ތެރެއިން 80 ޕަސަންޓު ފައިސާ އަނބުރާ ޕީއެސްއެމްއަށް ލިބިފައިނުވާ ކަމަށާއި، ލިބުނު 20 ޕަސަންޓް ފައިސާއަކީ އެންމެ 76،731 ޑޮލަރު ކަމަށް ރިޕޯޓުގައި ފާހަގަކޮށްފައިވެއެވެ.
މި މައްސަލައިގައި ޕީއެސްއެމްގެ ކުރީގެ ފައިނޭންސް ޑިރެކްޓަރު އަޙްމަދު ހަނީފްގެ ނަން ފާހަގަކޮށްފައިވެއެވެ. އޭނާ ވަނީ މިދިޔަ އެޕްރީލް މަހު ސަސްޕެންޑުކޮށް، މާޗު މަހު ވަޒީފާއިން ވަކިކޮށްފައެވެ. އޮޑިޓް ރިޕޯޓުގައި ހަނީފްގެ ދަރިއެއްގެ ބޭންކު އެކައުންޓަށް ފައިސާ ޖަމާކުރެވިފައިވާ ކަމަށްވެސް ބަޔާންކޮށްފައިވެއެވެ.
އޮޑިޓް ރިޕޯޓުގައި ފާހަގަކޮށްފައިވާ އިތުރު ކަންކަމުގެ ތެރޭގައި، ޑޮލަރު ގަތުމުގެ ނަމުގައި ތަކުރާރުކޮށް ފައިސާ ނެގުމާއި، ބިލްތަކަށް ފައިސާ ދެއްކުމުގައި ހުރި އޮޅުންބޮޅުންތަކާއި، ފައިސާ ބެލެހެއްޓުމުގައި ހުރި މައްސަލަތައް ހިމެނެއެވެ. މީގެ އިތުރުން، ޕީއެސްއެމްގެ މާލީ ބަޔާންތައް އޮޑިޓްކުރުމުގައި ލަސްތަކެއް ހުރިކަންވެސް ފާހަގަކޮށްފައިވެއެވެ.
