މިއަދު ހެނދުނު ކަނޑިންމަ ރިސޯޓަށް ފެން އުފުލަމުންދިޔަ "ހަމްދު" ނަމަކަށް ކިޔާ މުދާ އުފުލާ ދޯންޏެއްގައި އަލިފާން ރޯވުމުގެ ހާދިސާއެއް ހިނގައިފިއެވެ. އެމްއެންޑީއެފުން ދީފައިވާ މަޢުލޫމާތުގައިވާ ގޮތުން، މި ހާދިސާގެ ރިޕޯޓު ލިބިފައިވަނީ ހެނދުނު 07:20 ހާއިރުއެވެ.
ދޯނީގެ އިންޖީނު ރޫމުގައި ރޯވި އަލިފާން ނިއްވުމަށް އެމްއެންޑީއެފް ސެންޓްރަލް އޭރިއާ ކޮމާންޑް، ދ. ކުޑަހުވަދޫ އަދި ފ. ނިލަންދޫ ފަޔަރ ސްޓޭޝަނުގެ ފަޔަރ ފައިޓަރުން ވަނީ ހަރަކާތްތެރިވެފައެވެ. އަލިފާން މުޅިން ނިއްވާލެވުނީ މެންދުރުފަހު 14:20 ހާއިރުއެވެ.
މި ހާދިސާގައި ދޯނީގައި ދަތުރުކުރި ހަތަރު މީހުންގެ ތެރެއިން އެއްވެސް މީހަކަށް އަނިޔާއެއް ވެފައި ނުވާކަން އިސްވެރިން ހާމަކޮށްފައިވެއެވެ. ނަމަވެސް، މި ހާދިސާގައި ދޯންޏަށް ވަރަށް ބޮޑެތި ގެއްލުންތަކެއް ލިބިފައިވާ ކަމަށް ވެސް ބުނެފައިވެއެވެ.
