ޕަބްލިކް ސަރވިސް މީޑިއާ (ޕީއެސްއެމް)އިން ޑޮލަރު ގަތުމަށް ނެގި ފައިސާއާއި، އާމްދަނީގެ ގޮތުގައި ލިބުނު ފައިސާ، އަދި ތިޖޫރީގައި ހުރި ފައިސާގެ ތެރެއިން ޖުމްލަ 9 މިލިއަން ރުފިޔާ ގެއްލިފައިވާ މައްސަލަ ތަޙުޤީޤުކުރުމަށް އެންޓި-ކޮރަޕްޝަން ކޮމިޝަން (އޭސީސީ)އަށް ފޮނުވާފައިވާ ކަމަށް ފުލުހުން މަޢުލޫމާތު ދީފައިވެއެވެ.

ކޮރަޕްޝަންގެ މައްސަލަތައް ތަޙުޤީޤުކުރުމުގެ އިޚްތިޞާޞް އޮންނަނީ އޭސީސީއަށް ކަމަށްވާތީ، ޕީއެސްއެމްގެ މި ހިޔާނާތުގެ މައްސަލަ އެ ކޮމިޝަނަށް ފޮނުވާފައިވާކަމަށް ފުލުހުން ބުނެފައިވެއެވެ.

އޮޑިޓަރ ޖެނެރަލްގެ ރިޕޯޓުގައި ފާހަގަކޮށްފައިވާ ގޮތުގައި، ޕީއެސްއެމްއިން ގެއްލިފައިވާ ފައިސާގެ ތެރޭގައި ހިމެނެނީ 2020 އިން 2024 ގެ އޭޕްރީލް މަހުގެ ނިޔަލަށް ރާއްޖެއިން ބޭރުގެ ފަރާތްތަކަށް ޑޮލަރުން ދައްކަންޖެހޭ ފައިސާ ދެއްކުމަށް ޑޮލަރު ގަތުމަށް ނަގާފައިވާ 4.6 މިލިއަން ރުފިޔާއާއި، 2017 އިން 2024 ގެ އޭޕްރީލް މަހުގެ ނިޔަލަށް އާމްދަނީއާއި އެހެނިހެން ގޮތްގޮތުން ބަލައިގަނެފައިވާ 4.3 މިލިއަން ރުފިޔާ، އަދި ތިޖޫރީގައި ބަހައްޓާފައިވާ 190,000 ރުފިޔާއެވެ.

ރިޕޯޓުގައި އިތުރަށް ބަޔާންކޮށްފައިވާ ގޮތުގައި، 2020 އިން 2024 ގެ އޭޕްރީލްގެ ނިޔަލަށް އެކި ފަހަރުމަތިން ޕީއެސްއެމްގެ އެކައުންޓުން 5.8 މިލިއަން ރުފިޔާ ނަގާފައިވާއިރު، މީގެ ތެރެއިން ކުންފުންޏަށް ލިބިފައިވަނީ 1.20 މިލިއަން ރުފިޔާއަށްވާ 76,000 ޑޮލަރެވެ. އަދި މި ފައިސާގެ ތެރެއިން 1.16 މިލިއަން ރުފިޔާ ޕީއެސްއެމްގެ ކުރީގެ ފައިނޭންސް ޑިރެކްޓަރު އަޙްމަދު ޙަނީފުގެ ދަރިއެއްގެ އެކައުންޓަށް ޖަމާކޮށްފައިވާކަން ފާހަގަކޮށްފައިވެއެވެ.

މީގެއިތުރުން، 2017 އިން 2024 ގެ ނިޔަލަށް ޕީއެސްއެމްއަށް ނަގުދު ފައިސާގެ ގޮތުގައި ލިބުނު 4.3 މިލިއަން ރުފިޔާ އެ ކުންފުނީގެ އެކައުންޓަށް ޖަމާކޮށްފައި ނުވާކަމާއި، މީގެ ތެރެއިން 4.1 މިލިއަން ރުފިޔާއާ އެންމެފަހުން ހަވާލުވި ކަމަށް ރެކޯޑުތަކުން ދައްކަނީ ހަނީފު ކަމަށްވެސް ރިޕޯޓުގައި ބަޔާންކޮށްފައިވެއެވެ.

އޮޑިޓަރ ޖެނެރަލްގެ ރިޕޯޓުގައި، މި މައްސަލައިގައި ޒިންމާވާ ފަރާތްތައް ހޯދައި ފިޔަވަޅު އެޅުމަށްޓަކައި، މި މައްސަލަ ތަޙުޤީޤުކުރުމަށް އޭސީސީއަށް ހުށަހެޅުމަށް އަންގާފައިވާކަން ފާހަގަކޮށްފައިވެއެވެ.