ފަތުރުވެރިކަމުގެ ސިނާޢަތުގެ ތަރައްޤީއަށް ޚަރަދުކުރުމަށް ޓޫރިޒަމް ޑިވެލޮޕްމަންޓް ފަންޑެއް ޤާއިމުކުރުމަށް ރާއްޖޭގެ ދެ ބޭންކަކާއެކު މަޝްވަރާތައް ފަށާފައިވާ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެއެވެ.

ބައިނަލްއަޤްވާމީ ޓޫރިޒަމް ދުވަހާ ގުޅިގެން ފުވައްމުލަކު ސިޓީ ކައުންސިލުން ބޭއްވި "ފުވައްމަލައް ޓޫރިޒަމް އެވޯޑް 2024″ ގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ވިދާޅުވީ މި މަޝްވަރާތައް ކުރިއަށްދަނީ ބޭންކް އޮފް މޯލްޑިވްސް (ބީއެމްއެލް) އަދި މޯލްޑިވްސް އިސްލާމިކް ބޭންކް (އެމްއައިބީ) އާ އެކުގައި ކަމަށެވެ.

މިނިސްޓަރު ފާހަގަކުރެއްވި ގޮތުގައި ފަތުރުވެރިކަން ކުރިއަރަމުންދާ ސަރަޙައްދުތަކުގައި މިހާރު ދިމާވެފައިވާ އެންމެ ބޮޑު ގޮންޖެހުމަކީ އަލަށް ފަތުރުވެރިކަމުގެ ވިޔަފާރިއަށް ވަންނަން ބޭނުންވާ ފަރާތްތަކަށް ބޭނުންވާ ފައިސާ ހޯދުމުގައި ދިމާވާ ދަތިތަކެވެ. ރާއްޖޭގެ ބޭންކުތަކުން ވިޔަފާރިތަކަށް ދޫކުރާ ލޯނުތަކުގެ އިންޓަރެސްޓް ރޭޓް ބޮޑުވުމުގެ ސަބަބުން އަލަށް ފަތުރުވެރިކަމުގެ ދާއިރާއަށް ވަންނަ ވިޔަފާރިތަކަށް ވަރަށް ބޮޑެތި ދަތިތަކާ ކުރިމަތިލާންޖެހޭ ކަމަށް މިނިސްޓަރު ވިދާޅުވިއެވެ.

މިނިސްޓަރު އިތުރަށް ވިދާޅުވީ މި މައްސަލަ ހައްލުކުރުމަށްޓަކައި ވޯލްޑް ބޭންކުގެ އައިއެފްސީއާ އެކުވެސް ރަސްމީ ބައްދަލުވުމެއް ބާއްވައި މަޝްވަރާކުރެވިފައިވާ ކަމަށެވެ. އަދި ބޭންކުތައް މެދުވެރިކޮށް ޤާއިމުކުރާ ޓޫރިޒަމް ޑިވެލޮޕްމަންޓް ފަންޑުގެ އިންޓަރެސްޓް ރޭޓް ކަނޑައެޅި، އަންނަ އަހަރުގެ ފުރަތަމަ ކުއާޓަރގައި މި ފަންޑުން ލޯނު ދޫކުރަން ފެށޭނެ ކަމަށް އުންމީދުކުރައްވާ ކަމަށް ވިދާޅުވިއެވެ.

މިނިސްޓަރު ޒުވާނުންނަށް އިލްތިމާސްކުރެއްވީ ބޭންކުތަކުން ފަށާ މި ޕްރޮގްރާމުގެ ބޭނުން ހިފައި ފަތުރުވެރިކަމުގެ ދާއިރާއަށް ނުކުތުމަށެވެ. އަދި ގެސްޓްހައުސް ފަތުރުވެރިކަން ކުރިއެރުވުމަށް ޓޫރިޒަމް މިނިސްޓްރީގައި ވަކި ޑިޕާޓްމަންޓެއް ޤާއިމުކުރައްވާނެ ކަމަށާއި، މިކަމުގެ ސަބަބުން ލޯކަލް ޓޫރިޒަމް ދާއިރާއަށް ލުއިފަސޭހަތަކެއް ލިބިގެންދާނެ ކަމަށްވެސް މިނިސްޓަރު ފާހަގަކުރެއްވިއެވެ.