އދ. ގެ 79 ވަނަ އާންމު މަޖިލީހުގައި ބައިވެރިވެވަޑައިގަތުމަށް ނިއުޔޯކަށް ކުރެއްވި ރަސްމީ ދަތުރުފުޅު ނިންމަވައިލައްވައި އެ ސިޓީން ރައީސް ޑރ. މުޙައްމަދު މުޢިއްޒު ފުރާވަޑައިގެންފިއެވެ.
އެމަނިކުފާނު މާލެއަށް ވަޑައިގަތުމަށް ފުރާވަޑައިގަތީ ވަނީ ހޮނިހިރު ދުވަހުއެވެ.
މި ދަތުރުފުޅުގައި ރައީސް މުޢިއްޒު ވަނީ އދ. ގެ އާންމު މަޖިލީހުގައި ތަޤުރީރު ކުރެއްވުމުގެ އިތުރުން، އދ. ގެ ސަލާމަތީ މަޖިލީހުގެ ހުޅުވާލެވިފައިވާ ބަހުސެއްގައި ބައިވެރިވެވަޑައިގެންފައެވެ. މިއީ ދިވެހިރާއްޖެ އދ. ގެ މެންބަރަކަށްވީތާ 59 އަހަރު ފަހުން، ދިވެހި ވެރިއަކު އދ. ގެ އެންމެ ބާރުގަދަ މި ގުނަވަނުގައި ވާހަކަފުޅު ދެއްކެވި ފުރަތަމަ ފަހަރެވެ.
އެމަނިކުފާނު ވަނީ އެކި ތަޤުރީރުތައް ދެއްވުމުގެ އިތުރުން، އާންމު މަޖިލީހުގެ ހަވާސާގައި ބޭއްވުނު އެކި ހަރަކާތްތަކުގެ އިސްވެރިޔާގެ ގޮތުގައި ބައިވެރިވެވަޑައިގެންފައެވެ. މި ހަރަކާތްތަކުގައި މޫސުމަށް އަންނަ ބަދަލުތަކާއި، އިއާދަކުރަނިވި ހަކަތައާއި، އިޖުތިމާޢީ އަދި އިޤްތިޞާދީ ގޮންޖެހުންތަކާއި، ޑިޖިޓަލައިޒޭޝަން ފަދަ މުހިންމު މައްސަލަތައް ފާހަގަކުރެއްވިއެވެ.
ރައީސް މުޢިއްޒު ވަނީ އާންމު މަޖިލީހަށް ވަޑައިގެންނެވި އެކި ޤައުމުތަކުގެ އިސް ވަފުދުތަކާ ދެކޮޅުން ބައްދަލުވުންތައް ބާއްވަވައި، އަދި ބައިނަލްއަޤްވާމީ ފެންވަރުގެ ބައްދަލުވުންތަކުގައި ބައިވެރިވެވަޑައިގެންފައެވެ. މީގެ ތެރޭގައި އދ. ގެ ސެކްރެޓަރީ ޖެނެރަލް އަންޓޯނިއޯ ގުޓެރެސްއާ ބޭއްވެވި ބައްދަލުވުން ހިމެނެއެވެ.
މީގެ އިތުރުން، ރައީސް ވަނީ ނިއުޔޯކުގައި ދިރިއުޅުއްވާ ދިވެހި ރައްޔިތުންނާ ބައްދަލުކުރައްވައި، ޕްރިންސްޓަން ޔުނިވަރސިޓީގެ ޕަބްލިކް އެންޑް އިންޓަރނޭޝަނަލް އެފެއާޒް ސްކޫލްގެ "ޑީންސް ލީޑަރޝިޕް ސީރީޒް" ގެ ދަށުން އެ ޔުނިވަރސިޓީގައި ތަޤުރީރު ކުރައްވާފައެވެ.
އެމަނިކުފާނު ވަނީ ނިއުޔޯކުގައި ހުންނަ ގޫގުލްގެ އޮފީހަށް ޒިޔާރަތްކުރައްވައި އެތަން ބައްލަވާލައްވާފައިވެސް މެއެވެ.
