އދ. ގައި ރާއްޖެއަކީ ބައިނަލްއަގްވާމީ މައިދާނުގައި އިޙްތިރާމް ލިބިގެންވާ ޤައުމެއްކަން ރައީސް ޑރ. މުޙައްމަދު މުޢިއްޒު ސާބިތުކޮށްދެއްވައިފި ކަމުގައި ފޮރިން މިނިސްޓަރު މޫސާ ޒަމީރު ވިދާޅުވެއްޖެއެވެ.
އދ. ގެ 79 ވަނަ އާންމު މަޖިލީހުގައި ބައިވެރިވުމަށް ރައީސްއާއެކު ކުރެއްވި ދަތުރުފުޅު ނިންމަވާލެއްވުމަށްފަހު، މިނިސްޓަރު އެކްސްގައި ކުރެއްވި ޕޯސްޓެއްގައި މި ދަތުރަކީ ވަރަށް އުފެއްދުންތެރި އަދި ކާމިޔާބު ދަތުރެއްކަމަށް ބަޔާންކުރެއްވިއެވެ.
މިނިސްޓަރު ޒަމީރު އިތުރަށް ފާހަގަކުރެއްވި ގޮތުގައި ރައީސް މުޢިއްޒު ވަނީ ރާއްޖޭގެ އަޑު ބައިނަލްއަގްވާމީ މައިދާނުގައި އިއްވައި، ރާއްޖެއަކީ ބައިނަލްއަގްވާމީ މުހިންމު މައްސަލަތަކުގައި އަޑުއުފުލައި ބަސްބުނާނެ ޤައުމެއްކަން ދައްކުވައިދެއްވައިފައެވެ. މި ދަތުރުފުޅުގައި ރައީސް ވަނީ އދ. ގެ އާންމު މަޖިލީހުގައި ތަޤުރީރު ކުރެއްވުމުގެ އިތުރުން އެކިއެކި ހަރަކާތްތަކުގައި ބައިވެރިވެވަޑައިގެން ތަފާތު މައުޟޫޢުތަކަށް ވާހަކަފުޅު ދައްކަވާފައެވެ.
ޚާއްޞަކޮށް ފާހަގަކޮށްލެވެނީ ރައީސް މުޢިއްޒު އދ. ގެ ސަލާމަތީ މަޖިލީހުގައި ތަޤުރީރުކުރެއްވި ކަމެވެ. މިއީ ސަލާމަތީ މަޖިލީހުގައި ދިވެހި ރައީސަކު ވާހަކަދެއްކެވި ފުރަތަމަ ފަހަރެވެ. މީގެއިތުރުން، ރައީސް ވަނީ ތަރައްޤީވަމުން އަންނަ ކުދި ޖަޒީރާ ޤައުމުތަކުގެ ހަރަކާތްތަކުގައި ބައިވެރިވެވަޑައިގެން، އެފަދަ ޤައުމުތަކަށް ކުރިމަތިވެފައިވާ ގޮންޖެހުންތައް ފާހަގަކުރައްވާފައެވެ.
ރައީސްގެ ދަތުރުފުޅުގައި އެމެރިކާގެ ޕްރިންސްޓަން ޔުނިވަރސިޓީއަށް ޒިޔާރަތްކުރައްވައި ތަޤުރީރު ކުރެއްވުމާއެކު، އދ. ގެ ސެކްރެޓަރީ ޖެނެރަލްއާ ބައްދަލުކުރެއްވިއެވެ. އަދި އެތައް ޤައުމެއްގެ އިސްވެރިންނާ ބައްދަލުކުރައްވައި، ގުޅުން ބަދަހިކުރުމާއި އެއްބާރުލުން ދިނުމާ ގުޅޭގޮތުން މަޝްވަރާކުރެއްވިއެވެ. މި ކާމިޔާބު ދަތުރުފުޅު ނިންމަވާލައްވައި ރައީސް މިހާރު ވަނީ ރާއްޖެ ވަޑައިގަތުމަށް ފުރާވަޑައިގެންފައެވެ.
