ދިވެހިރާއްޖެއާއި އިންޑިއާއާ ދެމެދު އޮތް ގުޅުމުގެ ޙަޤީޤަތް ސާފުކޮށްދެއްވާފައެވެ. އެމެރިކާގެ ޕްރިންސްޓަން ޔުނިވަރސިޓީގެ ޑީންސް ލީޑަރޝިޕް ސީރީޒްގައި މެހެމާނެއްގެ ގޮތުގައި ބައިވެރިވެވަޑައިގެން، ރައީސް ވިދާޅުވެފައިވަނީ ދެ ޤައުމުގެ ދެމެދުގައި އެއްވެސް މައްސަލައެއް ނެތް ކަމަށާއި، "އިންޑިއާ އައުޓް" ކަހަލަ އެޖެންޑާއެއް ނުގެންގުޅުއްވާ ކަމަށެވެ. ނަމަވެސް، ރާއްޖޭގައި ބޭރު ޤައުމުތަކުގެ ސިފައިން ތިބުމަކީ ދިވެހި ރައްޔިތުން އެދޭ ކަމެއް ނޫންކަން ރައީސް ފާހަގަކުރެއްވިއެވެ.
ރައީސް އިތުރަށް ވިދާޅުވެފައިވަނީ އިންޑިއާ ސަރުކާރާއެކު ޑިޕްލޮމެޓިކް މަގުން މަޝްވަރާކޮށްގެން، އިންޑިއާ ސިފައިން ރާއްޖެއިން ފޮނުވާލެވިފައިވާ ކަމަށެވެ. މި މަސައްކަތުގައި އިންޑިއާ ސަރުކާރުގެ ފުރިހަމަ އެއްބާރުލުން ލިބުނު ކަމަށް ރައީސް ފާހަގަކުރެއްވިއެވެ. މިހާރު ރާއްޖޭގައި ތިބީ އިންޑިއާއިން ހަދިޔާކޮށްފައިވާ ޑޯނިއަރ މަތިންދާބޯޓާއި ހެލިކޮޕްޓަރު ދުއްވުމަށް ގެނެސްފައިވާ އިންޑިއާގެ ސިވިލް މުވައްޒަފުން ކަމަށްވެސް ރައީސް ވިދާޅުވިއެވެ.
އިންޑިއާގެ ބޮޑުވަޒީރު ނަރެންދްރަ މޯދީއަށް ދެ ޑެޕިއުޓީ މިނިސްޓަރަކު މަލާމާތްކުރި މައްސަލައާ ގުޅޭގޮތުން ވާހަކަފުޅު ދައްކަވަމުން، ރައީސް މުޢިއްޒު ވިދާޅުވީ އެފަދަ ޢަމަލުތައް އެއްގޮތަކަށްވެސް ޤަބޫލުފުޅު ނުކުރައްވާ ކަމަށެވެ. އަދި މި މައްސަލައާ ގުޅިގެން އަޅުއްވަންޖެހުނު ފިޔަވަޅުތައް އަޅުއްވާފައިވާނެ ކަމަށް ރައީސް ވިދާޅުވިއެވެ. ރައީސް މުޢިއްޒުގެ މި ވާހަކަފުޅުތަކުން، ދިވެހިރާއްޖެއިން އިންޑިއާއާއެކު އޮތް ގުޅުން ހަރުދަނާކޮށް، ދެމެހެއްޓެނިވި ގޮތެއްގައި ކުރިއަށް ގެންދިއުމަށް މަސައްކަތްކުރައްވާކަން ހާމަވެގެން ގޮސްފައި ވެއެވެ.
