ރައީސް ޑރ. މުހައްމަދު މުއިއްޒަށް އަމާޒުކޮށް ދެވުނު މަރުގެ އިންޒާރާ ގުޅިގެން، ޖުމްހޫރީ ޕާޓީ (ޖޭޕީ) އާއި މޯލްޑިވްސް ނެޝަނަލް ޕާޓީ (އެމްއެންޕީ) އިން އެ ޢަމަލު ގަދައަޅައި ކުށްވެރިކޮށްފިއެވެ.
މި އިންޒާރު ދީފައިވަނީ އދ. ގެ އާންމު މަޖިލީހުގައި ރައީސް ދެއްކެވި ވާހަކަފުޅު، ރައީސް އޮފީހުގެ ފޭސްބުކް ޕޭޖުން ލައިވްކޮށްފައިވަނިކޮށް، އެ ލައިވްއަށް މީހަކު ކުރި ކޮމެންޓެއްގައެވެ.
ޖޭޕީން މި މައްސަލަ ސިފަކޮށްފައިވަނީ ޤައުމުގެ އަމާންކަމާއި ސުލްހަމަސަލަސްކަން ނަގާލައި، ރައްޔިތުންގެ ހިތްތަކުގައި ބިރުވެރިކަން އުފައްދާ، ނާތަހުޒީބީ އަދި ދަށުދަރަޖައިގެ ޢަމަލެއްގެ ގޮތުގައެވެ. އަދި މިއީ ހަމައެކަނި ރައީސަށް ދެވުނު އިންޒާރެއް ނޫންކަމަށާއި، މުޅި ދިވެހި ޤައުމަށް ދެވުނު ބިރުވެރި އިންޒާރެއްކަމަށް ޖޭޕީން ފާހަގަކޮށްފައިވެއެވެ.
އެމްއެންޕީން ވެސް މި ޢަމަލު ކުށްވެރިކޮށް، މިއީ ސީރިއަސް މައްސަލައެއްގެ ގޮތުގައި ބަލައި، އަވަސް ފިޔަވަޅު އެޅުމަށް ގޮވާލާފައިވެއެވެ. ހަމައެހެންމެ، ޕީޕަލްސް ނެޝަނަލް ކޮންގްރެސް (ޕީއެންސީ) އިން ވެސް މި ޢަމަލު ކުށްވެރިކޮށްފައިވެއެވެ.
މި މައްސަލައިގައި ޖޭޕީން ވަނީ ދިވެހިރާއްޖޭގެ ތަންފީޒީ އިދާރާތަކަށް ގޮވާލައި، މި ނުރައްކާތެރި މައްސަލަ ތަޙްޤީޤުކޮށް، ޤާނޫނީ ފިޔަވަޅު އަޅަން އެދިފައެވެ. އެހެންނަމަވެސް، މިހާތަނަށް އެއްވެސް މީހަކު ހައްޔަރުކޮށްފައި ނުވާކަމަށް ފުލުހުން މަޢުލޫމާތު ދީފައިވެއެވެ.
