ސޯޝަލް މީޑިއާ އެކްޓިވިސްޓު ތައްޔިބު ޝަހީމް ފުލުހުންގެ ނަމުގައި ސައްހަނޫން ބަޔާނެއް ދައުރުކުރި ކަމަށް ތުހުމަތުކުރެވޭ މައްސަލައިގައި ފުލުސް އޮފީހަށް ހާޒިރުކޮށް ސުވާލުކޮށްފިއެވެ.
މި މައްސަލައިގެ ތަޙުޤީޤަށް ބޭނުންވާތީ، މި މަހުގެ 12 ވަނަ ދުވަހު ކޯޓު އަމުރެއްގެ ދަށުން ތައްޔިބުގެ ފޯނާއި ލެޕްޓޮޕު، ހާޑްޑްރައިވް އަދި ފަސް ޕެންޑްރައިވް ފުލުހުންގެ ބެލުމުގެ ދަށަށް ގެންގޮސްފައިވެއެވެ.
ފުލުހުންގެ ފަރާތުން މީޑިއާތަކަށް ފޮނުވި މެސެޖެއްގައި މި މަޢުލޫމާތު ހާމަކޮށްފައިވީ ނަމަވެސް، އިތުރު ތަފްސީލެއް ހިއްސާކޮށްފައެއް ނުވެއެވެ. ތައްޔިބަކީ ސޯޝަލް މީޑިއާގެ އެކި ޕްލެޓްފޯމްތަކުގައި ސަރުކާރަށް ފާޑުކިޔައި، އެކިއެކި ތުހުމަތުތައް ކުރަމުންދާ ފަރާތެކެވެ. ކުރީގެ ރައީސް ޔާމީންގެ ވެރިކަމުގައިވެސް ތައްޔިބުގެ ފޯނު ކޯޓު އަމުރަކާ ގުޅިގެން ފުލުހުން ހިފަހައްޓާފައިވާކަން ފާހަގަކުރެވެއެވެ.
