ދިވެހި ސަރުކާރުން މިއަހަރުގެ މިހާތަނަށް އެކި މަޝްރޫޢުތަކަށް ތިން ބިލިއަން ރުފިޔާ (213 މިލިއަން ޑޮލަރު) ގެ ލޯނު ނަގާފައިވެއެވެ. ފިނޭންސް މިނިސްޓްރީގެ ތަފާސްހިސާބުތަކުން ދައްކާގޮތުގައި، މިއަހަރު ސަރުކާރުން ދެ ލޯނަކަށް ގެރެންޓީވެސް ދީފައިވެއެވެ.
މިހާތަނަށް ނަގާފައިވާ ލޯނުތަކުގެ ތެރެއިން އެންމެ ބޮޑު އަދަދެއް ނަގާފައިވަނީ ސައުދީ ޑިވެލޮޕްމަންޓް ފަންޑުންނެވެ. އެ ފަންޑުން ނަގާފައިވާ ލޯނުގެ އަދަދު 149 މިލިއަން ޑޮލަރަށް އަރައެވެ. މީގެ ތެރޭގައި ހެލްތު ސެކްޓަރ ޑިވެލޮޕްމަންޓް ޕްރޮޖެކްޓަށް 49 މިލިއަން ޑޮލަރާއި، ވެލާނާ އިންޓަނޭޝަނަލް އެއަރޕޯޓް ޕްރޮޖެކްޓަށް 99 މިލިއަން ޑޮލަރު ހިމެނެއެވެ.
އިސްލާމިކް ޑިވެލޮޕްމަންޓް ބޭންކުން އެސްއެމްއީ އިމްޕެކްޓް ފަންޑަށް އެހީވުމަށް ދެ ލޯނެއް ނަގާފައިވެއެވެ. މީގެ ތެރޭގައި 10.2 މިލިއަން ޑޮލަރާއި 30 މިލިއަން ޑޮލަރުގެ ލޯނު ހިމެނެއެވެ. އަދި ކުވެއިތު ފަންޑް ފޮރ އަރަބް އިކޮނޮމިކް ޑިވެލޮޕްމަންޓުން ކުދި ރަށްރަށުގެ ހޮސްޕިޓަލްތަކުގެ މަޝްރޫޢަށް 9.83 މިލިއަން ޑޮލަރުގެ ލޯނެއް ނަގާފައިވެއެވެ.
މިއަހަރުގެ ފުރަތަމަ ކުއާޓަރ ނިމުނުއިރު ދައުލަތުގެ ޖުމްލަ ދަރަނި 126 ބިލިއަން ރުފިޔާއަށް އަރާފައިވެއެވެ. މި އިތުރުވުން އައިސްފައިވަނީ އެތެރޭގެ މާކެޓުން ނެގި ދަރަނި އިތުރުވުމުގެ ސަބަބުންނެވެ. ފުރަތަމަ ތިން މަހުގެ ތެރޭގައި އެތެރޭގެ ދަރަނި 74 ބިލިއަން ރުފިޔާއަށް އަރާފައިވެއެވެ.
ދައުލަތުން އެންމެ ބޮޑު ދަރަންޏެއް އަދާކުރަން އޮތީ 2026 ވަނަ އަހަރުއެވެ. އެ އަހަރު ދަރަނި ދެއްކުމަށް 15 ބިލިއަން ރުފިޔާ ހޭދަކުރަން ޖެހޭނެއެވެ. މިއީ ރާއްޖޭގެ ތާރީޚުގައިވެސް އެންމެ ބޮޑު ދަރަނި ދައްކަން ޖެހޭ އަހަރެވެ.
