ބޭންކް އޮފް މޯލްޑިވްސް (ބީއެމްއެލް) އިން މާލޭގެ ދެ ގެއެއް ނީލަމުގައި ވިއްކާލަން އިޢުލާންކޮށްފިއެވެ. ބޭންކުން ނެރުނު ނޫސްބަޔާނެއްގައި ބުނެފައިވަނީ، ދެ ލޯނަކަށް ފައިސާ ނުދެއްކުމުގެ ސަބަބުން މި ދެ ގެ ނީލަމުގައި ވިއްކާލަން ނިންމާފައިވާ ކަމަށެވެ.
މި ދެ ގެއަކީ ސަންފްރަންޓް ލައިޓްޝޮޕްގެ ގޯޅިތެރޭގައި ހުންނަ މ. ނާއިންފަރުއާގެ އާއި ބިސްބުރު ކައިރީގައި ހުންނަ މ. ބީޗްކޯނާ އެވެ.
ނާއިންފަރުއާގެއަކީ 792 އަކަފޫޓުގެ ގެއެކެވެ. މި ގެ ނީލަމުގައި ވިއްކާލުމަށް ފަށާ އަގަކީ 13 މިލިއަން ރުފިޔާއެވެ. މި ގެ ގަތުމަށް ނީލަން ހުށަހެޅުމުގެ މުއްދަތު ހަމަވާނީ އަންނަ މަހުގެ 10 ވަނަ ދުވަހުއެވެ. އަނެއް ގެކަމަށްވާ ބީޗް ކޯނާއަކީ 927.33 އަކަފޫޓުގެ ގެއެކެވެ. މި ގެ ވިއްކާލުމަށް ނީލަން ފަށާ އެންމެ ދަށް އަގަކީ 23.8 މިލިއަން ރުފިޔާއެވެ. މި ގެއަށް އަގު ހުށަހެޅުމުގެ މުއްދަތު ހަމަވާނީ އަންނަ މަހުގެ 15 ވަނަ ދުވަހުއެވެ.
ބީއެމްއެލްއިން ބުނެފައިވަނީ، މި ދެ ގެ ވިއްކާލެވޭނީ އެންމެ މަތީ އަގު ހުށަހަޅާ ފަރާތަކަށް ކަމަށެވެ. އެންމެ މަތީ އަގެއްކަމަށް ބެލެވޭނީ އެ އަގަށް ބަދަލެއް ނައިސް ފަސް ދުވަސް ފާއިތުވުމުންނެވެ. އަދި މުއްދަތު ހަމަވާ ތާރީޚާ ހަމައަށް އަގު ހުށަހަޅާ ފަރާތްތަކުގެ ތެރެއިން، އެ ވަގުތު އެތަނަށް ހާޒިރުވެތިބޭ ފަރާތްތަކުގެ ހާޒިރުގައި ނީލަން ހުޅުވައި، އެންމެ މަތީ އަގު އިޢުލާންކުރެވޭނެ ކަމަށްވެސް ބީއެމްއެލްއިން ބުނެފައިވެއެވެ.
