ހުރިހާ ތަނެއްގައި، ހުރިހާ ވަގުތެއްގައިވެސް، ދިވެހި ރާއްޖެއިން ފަލަސްތީނުގެ ހައްގުގައި ވަކާލާތު ކުރާނެ ކަމުގައި ރައީސް މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވެފައިވަނީ އދ. ގެ 79 ވަނަ އާންމު މަޖިލީހުގެ އަރިމަތީގައި، މިއަދު ފަލަސްޠީނު ދައުލަތުގެ ރައީސް މަޙްމޫދު ޢައްބާސްއާ ބައްދަލުކުރެއްވުމަށްފަހު މީޑިއާތަކާއި މައުލޫމާތު ހިއްސާ ކުރައްވަމުންނެވެ.
މިއަދު މީޑިއާތަކަށް މައުލޫމާތު ދެއްވަމުން ރައީސް ވިދާޅުވީ، ދިވެހި ހުރިހާ ރައްޔިތުންނަކީވެސް ފަލަސްތީނަށް ވަަރަށް ބޮޑަށް ތާއީކުރާ ރައްޔިތެއްކަމަށާއި، މިނިވަން ދައުލަތެއް ގާއިމް ކުރުމަށް ފަލަސްތީނުން ކުރަމުންދާ މަސައްކަތްތަކަށް ދިވެހި އެންމެހާ ރައްޔިތުންގެ ތާއީދުވެސް ލިބިގެންދާނެ ކަމުގައެވެ.
އަދި ރައީސް މުއިއްޒުވަނީ އިސްރާއީލުން ފަލަސްތީނުގެ ރައްޔިތުންނާއި ދެކޮޅަށް އިސްރާއީލުން ހިންގަމުންދާ ޖަރީމާތައް ކުށްވެރި ކުރައްވާކަމަށް ވިދާޅުވެފައެވެ.
ރައީސް މުއިއްޒުވަނީ މިއަދު ފަލަސްތީނުގެ ރައީސް މަހުމޫދު އައްބާސްއާވެސް ބައްދަލު ކުރައްވާފައެވެ.
މި ބައްދަލު ކުރެއްވުމުގައިވެސް ރައީސް ޑރ. މުޢިއްޒު ވަނީ ކޮންމެ ގޮތަކުންވެސް ފަލަސްޠީނަށް ދިވެހިރާއްޖެއިން ދޭ ވަރުގަދަ އެއްބާރުލުން އަލުން ކަށަވަރުކޮށްދެއްވިއެވެ. އަދި އެމަނިކުފާނު ވަނީ ފަލަސްޠީނު ރައްޔިތުންނަށް އެމީހުންގެ ޙައްޤުތައް ލިބިގެންދާނެކަމުގެ އުއްމީދު އާކުރައްވާފައެވެ. އަދި ފަލަސްޠީނަކީ މިނިވަން ޤައުމެއްގެ ގޮތުގައި ބައިނަލްއަޤްވާމީ ތާއީދު ހޯދުމަށް ދިވެހިރާއްޖެއިން ކުރަމުންދާ މަސައްކަތް ކުރިއަށް ގެންދާނެކަމުގެ ޔަގީންކަން ދެއްވިއެވެ.
ރައީސް ޢައްބާސްވަނީ ދިވެހިރާއްޖެއިން ދިގު މާޒީގައި ފަލަސްތީނަށް ރާއްޖެއިން ދެމުން އަންނަ އެހީތެރިކަމަށް ޝުކުރު އަދާކުރައްވަމުން ވިދާޅުވީ، "ދިވެހިރާއްޖެއިން ފަލަސްޠީނު ރައްޔިތުންނަށް ދެއްވާ އެހީތެރިކަން އަޅުގަނޑުމެންނަށް އަބަދުވެސް އެނގޭ، އަދި ތިޔަ ބޭފުޅުންގެ ދެމެހެއްޓެނިވި އެއްބާރުލުމަށް އަޅުގަނޑުމެން ފުން އިޙްތިރާމް ކުރަން" ކަމުގައެވެ.
މި ދެ ލީޑަރުން ވަނީ ދެ ޤައުމުގެ ދެމެދުގައި އެއްބާރުލުން ދެވިދާނެ ދާއިރާތަކާ މެދުވެސް މަޝްވަރާކުރައްވާފައެވެ.
ބައްދަލުވުން ނިންމަވާލެއްވީ ދެ ރައީސުންވެސް ދެ ފަރާތަށް މުހިންމު ކަންކަމުގައި އެކުގައި މަސައްކަތްކުރުމަށާއި ދިވެހިރާއްޖެއާއި ފަލަސްޠީނާ ދެމެދު އޮންނަ ޑިޕްލޮމެޓިކް ގުޅުން އިތުރަށް ވަރުގަދަ ކުރުމަށް އަޒުމް ކަނޑައަޅުއްވައިގެންނެވެ.
