ސިއްޙީ ވަޒީރު އަބްދުﷲ ޚަލީލް އޭޝިއާ ޕެސިފިކް ރީޖަނަލް ފޯރަމް އޮން ހެލްތު އެންޑް އެންވަޔަރަންމަންޓް (އޭޕީއާރުއެފްއެޗްއީ)ގެ ފަސްވަނަ މިނިސްޓަރުންގެ ބައްދަލުވުމާއި 12 ވަނަ ހައި ލެވެލް އޮފިޝަލްސް މީޓިން (އެޗްއެލްއޯއެމް) ގައި ބައިވެރިވެވަޑައިގަތުމަށް އިންޑޮނޭޝިއާގެ ޖަކާޓާއަށް ފުރާވަޑައިގެންފިއެވެ.
ސެޕްޓެމްބަރު 24 އިން 26 އަށް ކުރައްވާ މި ދަތުރުފުޅުގައި، އިންޑޮނޭޝިއާގެ ސިއްޙީ ދާއިރާގެ ފަންނީ ބޭފުޅުންނާ ބައްދަލުކުރައްވައި، އެކިއެކި ސިއްޙީ ޚިދުމަތްދޭ ތަންތަނަށް ޒިޔާރަތްކުރެއްވުމަށް ވަނީ ހަމަޖެހިފައެވެ.
ވަޒީރު ޚާއްޞަކޮށް އަލިއަޅުއްވާލައްވާނީ ޕްރައިމަރީ ހެލްތުކެއަރ، އުމުރުން ދުވަސްވީ މީހުންނަށް ފަރުވާ ދިނުމުގެ ކަންކަން، ހެލްތު އިންފޮމޭޝަން ސިސްޓަމްތަކާއި، ސިއްޙީ ޚިދުމަތްތަކުގައި ޑިޖިޓަލް ޓޫލްސް ބޭނުންކުރުން ފަދަ ދާއިރާތަކަށެވެ. އިންޑޮނޭޝިއާގައި މިފަދަ ކަންކަން ކުރަމުންދާ ގޮތް ބައްލަވައި، އެ ޤައުމުގެ ތަޖުރިބާގެ އަލީގައި ރާއްޖޭގެ ސިއްޙީ ޚިދުމަތް ފޯރުކޮށްދިނުމުގެ ކަންކަން ހަރުދަނާކުރުމާ ގުޅޭގޮތުން މަޝްވަރާކުރެއްވުމަށްވެސް ވަނީ ހަމަޖެހިފައެވެ.
އޭޝިއާ ޕެސިފިކް ރީޖަނަލް ފޯރަމް އޮން ހެލްތު އެންޑް އެންވަޔަރަންމަންޓްގެ މައިގަނޑު އަމާޒަކީ މެމްބަރު ޤައުމުތަކުން ނޭޝަނަލް އެންވަޔަރަންމަންޓަލް ހެލްތު އެކްޝަން ޕްލޭންތައް ތަންފީޒުކުރުމަށް ހިތްވަރުދިނުމެވެ. ރާއްޖެއިން މި ފޯރަމްގައި ބައިވެރިވުމުން ފަންނީ ތަޖުރިބާއާއި އެކިއެކި ވަސީލަތްތައް ހޯދުމުގެ ފުރުޞަތު ލިބިގެންދާނެ ކަމަށް ވަޒީރު ވިދާޅުވިއެވެ. އަދި ދެމެހެއްޓެނިވި އަދި ޚަރަދު ކުޑަ ސިއްޙީ ފަރުވާއާއި ތިމާވެށީގެ ސިޔާސަތުތައް އެކުލަވާލުމުގައި މެމްބަރު ޤައުމުތަކުން އެހީތެރިވެދޭނެއެވެ.
