މަސްތުވާތަކެތި ބޮކްސާ ތެރޭގައި ފޮރުވައިގެން ރާއްޖެއަށް އެތެރެކުރަން އުޅުނު ކަމަށް ތުހުމަތުކުރެވޭ މީހެއްގެ ބަންދުގެ މުއްދަތު 30 ދުވަހަށް އިތުރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ ސ. ހިތަދޫ/ ސަމަންދަރުގެ، އަޙްމަދު އަޙްސަން (35 އަހަރު) އެވެ. އޭނާ ހައްޔަރުކުރީ މި މަހުގެ 16 ވަނަ ދުވަހު މެލޭޝިއާ އެއަރލައިންސްގެ ފްލައިޓަކުން ރާއްޖެ އައި ވަގުތު ވެލާނާ އިންޓަނޭޝަނަލް އެއަރޕޯޓުގައެވެ.
އަޙްސަންގެ ބަންދާ ގުޅޭގޮތުން ކްރިމިނަލް ކޯޓުން ފުރަތަމަ އަމުރުކުރީ ފަސް ދުވަހުގެ މުއްދަތަށެވެ. ނަމަވެސް އެ މުއްދަތު ހަމަވުމާ ގުޅިގެން، އިތުރު މުއްދަތަކަށް ބަންދުކުރުމަށް އެދި އިއްޔެ ކޯޓަށް ހާޒިރުކުރުމުން، އިތުރު 30 ދުވަހުގެ މުއްދަތަށް ބަންދުކުރުމަށް ކޯޓުން އަމުރުކޮށްފިއެވެ.
ކޯޓުން އޭނާގެ ބަންދު އިތުރުކުރި ސަބަބުގެ ގޮތުގައި ބަޔާންކޮށްފައިވަނީ، ހައްޔަރާއި ބަންދު ލޮގުގައި މަސްތުވާތަކެތީގެ ގިނަ މައްސަލަތަކުގައި ބަންދުކޮށްފައިވާތީ، މަސްތުވާތަކެތީގެ ވިޔަފާރީގައި އަމަލީގޮތުން ބައިވެރިވާ ފަރާތެއް ކަމަށް ބެލެވޭތީ ކަމަށެވެ. މި މައްސަލައަކީ މަސްތުވާތަކެތީގެ ވިޔަފާރިއާ ގުޅުންހުރި ސީރިއަސް މައްސަލައެއްގެ ގޮތުގައި ފުލުހުން ބަލަމުންދާ މައްސަލައެކެވެ.
