ފުލުހުންގެ ފަރާތުން ޓޯކޮށްފައިވާ އުޅަނދުތަކުގެ ތެރެއިން، ވެރިފަރާތުން ހަވާލުނުވި 22 އުޅަނދެއް ނައްތާލައިފިއެވެ. މީގެ ތެރޭގައި 21 ސައިކަލާއި އެއް ކާރު ހިމެނެއެވެ.
މި އުޅަނދުތައް ނައްތާލާފައިވަނީ، ޓޯކުރުމަށްފަހު ވަކި މުއްދަތެއް ދިނުމުންވެސް، އެ މުއްދަތުގެ ތެރޭގައި ވެރިފަރާތުން ހަވާލުނުވުމުގެ ސަބަބުންނެވެ.
މާލެ އާއި ހުޅުމާލޭގެ މަގުތަކާއި ގޯޅިތަކުގައި ގަވާއިދާ ޚިލާފަށް ގިނަ ދުވަސްވަންދެން ބަހައްޓާފައި ހުރި އުޅަނދުތައް އެހެން ސަރަހައްދުތަކަށް ބަދަލުކުރުމާއި ޓޯކުރުމުގެ މަސައްކަތް ފުލުހުން ދަނީ ކުރަމުންނެވެ. އެއްގަމު ދަތުރުފަތުރުގެ ޤާނޫނާ އެއްގޮތްވާ ގޮތުގެމަތިން، ރަޖިސްޓްރީނުކޮށް ބަންޑާރަ މަގުތަކުގައި ދުއްވާ އަދި ޕާކުކުރާ އުޅަނދުތަކާއި، އެހެން ޒޯންތަކުގައި ރަޖިސްޓްރީކޮށްފައިވާ އުޅަނދުތައް "އޭ" ޒޯންގައި ދުއްވުމާއި ޕާކުކުރުން ހުއްޓުވުމަށް މަސައްކަތްކުރެވެމުންދެއެވެ.
މި އުޅަނދުތައް ޤާނޫނާއި ގަވާއިދުތަކުގެ ތެރެއަށް ގެނައުމުގެ ފުރުސަތު ދިނުމުގެ ގޮތުން، ދަތުރުފަތުރާބެހޭ ވުޒާރާއާއި ކަމާ ގުޅުންހުރި އެހެނިހެން ވުޒާރާތައް ގުޅިގެން ހުޅުމާލޭގެ ލޮޓް ނަންބަރު 452 ބިމުގައި އުޅަނދުތައް ވަގުތީގޮތުން ބެހެއްޓުމުގެ އިންތިޒާމު ހަމަޖައްސާފައިވެއެވެ.
ޕާކިންގގެ މައްސަލަ ހައްލުކުރުމަށް މަގުތަކުން އުޅަނދުތައް ނަގަމުންދާއިރު، ހުޅުމާލޭގައި 15 ޕާކިން ބިލްޑިންގ ތަރައްޤީކުރުމަށް ޝައުޤުވެރިވާ ފަރާތްތަކަށް އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމުގެ ފުރުސަތު މިދިޔަ މަހުގެ 29 ވަނަ ދުވަހު އެޗްޑީސީން ހުޅުވާލާފައިވެއެވެ.
