ބޭންކް އޮފް މޯލްޑިވްސް (ބީއެމްއެލް) ގެ ޑިރެކްޓަރުންގެ ބޯޑަށް ތިން ބޭފުޅަކު މިއަދު އައްޔަންކޮށްފިއެވެ.

ބީއެމްއެލްގެ އެކްސްޓްރާ އޯޑިނަރީ ބައްދަލުވުމުގައި ބީއެމްއެލް ބޯޑަށް އަލަށް އައްޔަން ކުރީ  އަހުމަދު އަލީ ހަބީބާއި އަލީ އިރުފާނާއި މުހައްމަދު ޝާހިދެވެ. ޗެއާޕާސަންގެ މަގާމަށް އައްޔަން ކުރީ ރައީސް އޮފީހުގެ ކެބިނެޓް ސެކްރެޓަރީއެއްގެ ގޮތުގައި ހުންނެވި އަހުމަދު އަލީއެވެ.

މި ބައްދަލުވުން ކުރިއަށް ދިޔައީ މޯލްޑިވްސް ސެކިއުރިޓީ ޑިޕޮޒިޓަރީ (އެމްއެސްޑީ)ގެ އޮންލައިން ޕްލެޓްފޯމް "ފަހިވޯޓު" މެދުވެރިކޮށެވެ.

ސަރުކާރުގެ ފަރާތުން ބީއެމްއެލް ބޯޑަށް ހުށަހަޅާ އަދި އައްޔަންކޮށްފައިވާ ޑިރެކްޓަރުންނަކީ:

1. އަލްފާޟިލް އަހުމަދު އަލީ ހަބީބު، ނޫވިލާގެ، ސ. ހިތަދޫ
2. އަލްފާޟިލް ޢަލީ ފާރިސް މުޙައްމަދު، ގ. ސިނަމާލެ 3 35-04
3. އަލްފާޟިލް ޢާދިލް މޫސާ، ފެންއާރު، ބ. އޭދަފުށި
4. ޑރ.މަރްޔަމް ސުޒީ އާދަމް، މ. އެމޭޒަން، ކ. މާލެ
5. އަލްފާޟިލް ޢަލީ ޢިރުފާން، ޑޭލައިޓްވިލާ، ސ. މަރަދޫފޭދޫ
6. އަލްފާޟިލް މުޙައްމަދު ޝާހިދު، ހުޅުމާލެ ފްލެޓް ނަންބަރު 02-2-90

އާންމު ހިއްސާދާރުންގެ ފަރާތުން އިންތިޚާބުކޮށްފައިވާ 3 ޑިރެކްޓަރުންނަކީ:

1. އަލްފާޟިލް ޢަބްދުاللهނަސީމް، ކަރަންކާ ވިލާ، ހއ. ފިއްލަދޫ
2. އަލްފާޟިލް މޫސާ ރަޝީދު، މ. ޤަސީމް، ކ. މާލެ
3. އަލްފާޟިލް ނަޖީމް އިބްރާހީމް ޒަކަރިއްޔާ، މ. ދާޝީން، ކ. މާލެ

ބީއެމްއެލްގެ އީޖީއެމްއެއް ބޭއްވި އިރު އެ ބޭންކްގެ ބޯޑުގައި ސަރުކާރުގެ ފަރާތުން އިންނެވި އައިޝަތު ސަޖްނީ ވަނީ މަގާމުން އިސްތިއުފާ ދެއްވައިފައެވެ. އަދި ބީއެމްއެލްގެސީއީއޯ ކާލް ސްޓުމްކަ ވެސް މި ފަހުން ވަނީ އިސްތިއުފާ ދެއްވައިފައެވެ.