ކުންފުންޏާބެހޭ ގާނޫނަށް މުހިންމު އިސްލާހުތަކެއް ގެނައުމަށް ހުށަހެޅުނު ބިލެއް ރައްޔިތުންގެ މަޖިލީހުން މިއަދު ފާސްކޮށްފިއެވެ.
މި ބިލުގެ މައިގަނޑު މަޤްޞަދަކީ ކުންފުނިތަކުގެ އާންމު ޖަލްސާތައް ބޭއްވުމަށް ނޯޓިސް ދޭންޖެހޭ މުއްދަތު ކުރުކުރުމާއި، ކުންފުނިތަކުގެ ބޯޑަށް މެންބަރުން އައްޔަންކުރުމުގެ މުއްދަތު ކުރުކުރުމެވެ.
ސަރުކާރުގެ ފަރާތުން ފޭދޫ އުތުރު ދާއިރާގެ މެންބަރު އިސްމާޢީލް ނިޒާރު ހުށަހެޅުއްވި މި ބިލު ފާސްކުރުމަށްޓަކައި މަޖިލީހުން ވަނީ ދައުރުން ބޭރުގައި ސިލްސިލާ ޖަލްސާތަކެއް ބާއްވާފައެވެ. އިއްޔެ ބޭއްވުނު ޖަލްސާގައި ބިލަށް ބަހުސްކުރުމަށްފަހު، އިޤްތިޞާދީ ކޮމިޓީއަށް ދިރާސާކުރުމަށް ފޮނުވުނެވެ. ކޮމިޓީން އެއްވެސް ބަދަލެއް ނުގެނެސް ބިލު ފާސްކޮށް އަނބުރާ ތަޅުމަށް ފޮނުވިއެވެ.
މިއަދުގެ ޖަލްސާގައި މި ބިލު ފާސްކުރެވުނީ ވޯޓުގައި ބައިވެރިވި 85 މެންބަރުންގެ އިއްތިފާޤުންނެވެ. އެއްވެސް މެންބަރަކު ބިލާ ދެކޮޅަކަށް ވޯޓެއް ނުދެއްވައެވެ.
ބިލުގެ މުހިންމު ނުކުތާތަކުގެ ތެރޭގައި ހިމެނެނީ ހިއްސާދާރުންގެ ޚާއްޞަ އާންމު ޖަލްސާއަކަށް ނޯޓިސް ފޮނުވަންޖެހޭ މުއްދަތު 21 ދުވަހުން 3 ދުވަހަށް ކުރުކުރުމާއި، ޚާއްޞަ ގޮތުން ކުރާ އާންމު ޖަލްސާއެއްގެ ނޯޓިސް މުއްދަތު 14 ދުވަހުން 7 ދުވަހަށް ކުރުކުރުމެވެ. އަދި ޕަބްލިކް އަދި ޕްރައިވެޓް ކުންފުނިތަކުގެ މެނޭޖިންގ ޑިރެކްޓަރުންނާއި ޑިރެކްޓަރުންގެ މަޤާމު ހުސްވެއްޖެނަމަ، އެ މަޤާމަށް މީހުން އައްޔަންކުރުމަށް ރަޖިސްޓްރާރ އޮފް ކޮމްޕެނީޒްއަށް ދެވިފައިވާ 30 ދުވަހުގެ މުއްދަތު 10 ދުވަހަށް ކުރުކުރުންވެސް ހިމެނެއެވެ.
މި އިޞްލާޙުތަކަކީ ކުންފުނިތަކުގެ ހިންގުން އަވަސްކޮށް، ހަރުދަނާކުރުމަށް އެޅޭ މުހިންމު ފިޔަވަޅުތަކެކަމަށް ސަރުކާރުން ބުނެފައި ވެއެވެ.
