ތ. ތިމަރަފުށި ސަލްވާ، ފާތިމަތު ޝަހުދާ (30 އ.) އަނެއްކާވެސް ތޫނު އެއްޗަކުން ހަމަލާދިނުމުގެ މައްސަލައެއްގައި ހައްޔަރުކޮށްފިއެވެ. ޝަހުދާއަކީ މީގެ ކުރިންވެސް މިފަދަ އެތައް މައްސަލައެއްގައި ތުހުމަތުކުރެވިފައިވާ މީހެކެވެ. އޭނާގެ މައްޗަށް ދީނަށް ފުރައްސާރަކުރުމާއި މުދަލަށް ގެއްލުންދިނުން ފަދަ އެތައް ތުހުމަތުތަކެއް ކުރެވިފައިވާއިރު، ކުރިން ތިމަރަފުށީގެ ރައްޔިތުން ނުކުމެ އޭނާއާ ދެކޮޅަށް މުޒާހަރާވެސް ކޮށްފައިވެއެވެ.
ގާތްގަނޑަކަށް އަހަރެއްހާ ދުވަސްކުރިން ޝަހުދާ ވަނީ މާލޭގައި ފޯނު ވިއްކާ ތަނަކަށް ވަދެ ސޭލްސްމަނެއްގެ ކަރަށް ވަޅި ހަރާފައެވެ. މިފަހަރު ހައްޔަރުކުރެވުނީ މީހަކަށް ކަޓަރުން ކަމަށް ބެލެވޭ އެއްޗަކުން ހަމަލާދިން ކަމުގެ ތުހުމަތުގައެވެ. ނަމަވެސް، ކްރިމިނަލް ކޯޓުން ނެރުނު ބަންދު އަމުރުގައިވާ ގޮތުން، ޝަހުދާ މި ތުހުމަތަށް އިންކާރުކޮށްފައިވެއެވެ.
ކޯޓު އަމުރުގައި ބަޔާންކޮށްފައިވާ ގޮތުގައި، ޝަހުދާ ހަމަލާދިން ތަނަށް ދިޔައީ އޭނާގެ ފޯނު ހޯދަން ކަމަށް ބުނެފައިވެއެވެ. އެތަނަކީ ފިހާރައެއްކަން ސީދާ ބަޔާންކޮށްފައި ނެތްނަމަވެސް، ބޮޑަށް ބެލެވެނީ މިފަހަރުވެސް ފޯނު ވިއްކާ ނުވަތަ މަރާމާތުކުރާ ތަނަކަށް ހަމަލާދިން ކަމަށެވެ. މި މައްސަލައާ ގުޅިގެން ޝަހުދާ 15 ދުވަހަށް ބަންދުކުރުމަށް ވަނީ އަމުރުކޮށްފައެވެ.
ތޫނު އެއްޗެހިން ހަމަލާދިނުމަކީ ޖިނާއީ ބޮޑު ކުށެއް ކަމަށްވެފައި، އެފަދަ ކުށްތަކަށް ގިނަ އަހަރުތަކަށް ޖަލަށްލެވޭއިރު، ޝަހުދާ މިފަދަ ކުށްތަކުން ދޫވަމުންދާ ސަބަބު ސާފުވެފައެއް ނުވެއެވެ. ނަމަވެސް، ޝަހުދާއަކީ ނަފްސާނީ ބަލިމީހެއްކަމަށް ބުނާ އަޑުތަކެއްވެސް ފެތުރިފައިވެއެވެ.
