ރާއްޖޭގެ އުތުރުގައި ފަށަން ނިންމާފައިވާ ބަންކަރިންގެ ޚިދުމަތް ފަށަން މިހާރު ނިންމާފައިވަނީ އަންނަ ބުރާސްފަތި ދުވަހު ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ސީއީއޯ މުހައްމަދު ވަޖީހް ވިދާޅުވެއްޖެއެވެ. އެމްޕީއެލްއިން ބުނެފައިވަނީ މި ޚިދުމަތް ފަށާދުވަހުވެސް ކަސްޓަމަރުން ލިބޭނެ ކަމަށެވެ.
ދައުލަތުގެ މީޑިއާ، ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ވަޖީހް ވިދާޅުވީ، ބަންކަރިންގެ ޚިދުމަތް ފަށަން ހުރިހާ ތައްޔާރީތަކެއް ވެފައިވާ ކަމަށެވެ. އަދި ބައެއް ފަރާތްތަކުން މި ޚިދުމަތް ލަސްވާ ކަމަށް ބުނަމުންދާއިރު، އެމްޕީއެލްގެ ޕްލޭންތަކާ އެއްގޮތަށް ކުރިއަށް ގޮސް، މިހާރު ވަނީ ތައްޔާރުވެ ނިމިފައިކަމަށް އޭނާ ވިދާޅުވިއެވެ.
މި މަސައްކަތަށް ބޭނުންވާ ބޯޓުތައް މިހާރު ކުޅުދުއްފުށީގައި ބަނދަރުކޮށްފައިވާކަމަށް ވަޖީހް ފާހަގަކުރެއްވިއެވެ. އަދި ބަންކަރިންގެ ޚިދުމަތް ފެށުމުގެ ކުރިން ކުރަންޖެހޭ ތައްޔާރީތަކުގެ ތެރޭގައި އިންޓަނޭޝަނަލް ގޭޓްވޭއެއް ގާއިމުކުރުން ހިމެނޭކަމަށް ވިދާޅުވިއެވެ. މިގޮތުން ހއ. އުލިގަމުގައި އައިއެސްޕީއެސް ނަމުގައި ގޭޓްވޭއެއް ޚާއްޞަކޮށް، އެމްއެންޑީއެފް، އިމިގްރޭޝަން، ޕޯޓްހެލްތް އަދި ކަސްޓަމްސްއިން އެތަނުގައި މަސައްކަތްކުރާނެކަމަށް އޭނާ ހާމަކުރެއްވިއެވެ.
ވަޖީހް ވިދާޅުވީ މިހާރު މަސައްކަތްކުރެވޭނެ ހުރިހާ ޖާގައެއް ތައްޔާރުކޮށް، ވަޒީފާއަށް މީހުން ނަގައި، ތައްޔާރުވެފައިވާ ކަމަށެވެ. އަދި މި ޚިދުމަތް ދޭއިރު އެމްޕީއެލްގެ ދައުރުގެ މައްޗަށް އަލިއަޅުވާލައްވަމުން، އެކަމަށް ޚާއްޞަކޮށްފައިވާ ވެބްސައިޓްގެ ޒަރީއާއިން އެމްޕީއެލުން ދޭނެ 14 ޚިދުމަތެއް މިހާރު އަންގައިދީފައިވާނެކަމަށާއި، 24 ގަޑިއިރުގެ ކޯލްސެންޓަރެއް ގާއިމުކޮށްފައިވާކަމަށްވެސް އޭނާ ވިދާޅުވިއެވެ.
އިހަވަންދިއްޕޮޅުގައި ފަށަން ނިންމާފައިވާ މި ބަންކަރިންގެ ޚިދުމަތް ހިންގަނީ ސަރުކާރުގެ ވިޔަފާރި ކުންފުނި، ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިސްވެ އޮވެގެންނެވެ.
