ދިވެހިރާއްޖެ އައިއެމްއެފްގެ "ބެއިލްއައުޓް"އަކަށް ދާކަށް ނުޖެހޭނެ ކަމުގައި ރާއްޖޭގެ ޚާރިޖީ ވަޒީރު މޫސާ ޒަމީރު ވިދާޅުވެއްޖެއެވެ. ޒަމީރު މިހެން ވިދާޅުވީ ހުކުރު ދުވަހުގެ ރޭ ކޮލޮމްބޯގައި ނޫސްވެރިންނަށް މައުލޫމާތު ދެއްވަމުންނެވެ.
ޒަމީރު ވިދާޅުވެފައިވަނީ، ދަރަނި އަދާކުރުމުގެ ޒިންމާތައް އަދާކުރުމަށްޓަކައި ޓެކްސް އިތުރުކުރުމުގެ މަސައްކަތް ސަރުކާރުން ކުރިއަށް ގެންދަމުންދާ ކަމުގައެވެ.
"އަޅުގަނޑުމެންގެ ބައިލެޓަރަލް ޕާޓްނަރުންނަކީ އަޅުގަނޑުމެންގެ ބޭނުންތަކާއި ޙާލަތަށް ވަރަށް ސަމާލުކަން ދޭ ފަރާތްތަކެއް،" ޒަމީރު ހުކުރު ދުވަހުގެ ރޭ ކޮލޮމްބޯގައި ނޫސްވެރިންނަށް ވިދާޅުވިއެވެ.
"މިވަގުތު އައި.އެމް.އެފްގެ އެހީއަށް ދާންވީ ވަގުތު ނޫން ކަމަށް އަޅުގަނޑު ޤަބޫލުކުރަން… އަޅުގަނޑުމެންނަށް ދިމާވެފައިވާ މައްސަލައަކީ ވަރަށް ވަގުތީ މައްސަލައެއް. މިހާރު އަޅުގަނޑުމެންގެ ރިޒާވްތައް ދަށްވެފައިވާތީ."
އޭނާ ވިދާޅުވީ ޓެކްސް އިޞްލާޙުތަކާއި ދައުލަތުގެ ކުންފުނިތައް އަލުން އިންތިޒާމުކުރުމުން ފައިސާގެ ދައުރުވުން ރަނގަޅުވާނެ ކަމަށެވެ.
ޒަމީރު ސްރީލަންކާއަށް ވަޑައިގެންފައިވަނީ ފިނޭންސް މިނިސްޓަރ މުޙައްމަދު ޝަފީޤާއެކު، އެޤައުމުގެ މަރުކަޒީ ބޭންކުގެ އިސްވެރިންނާއި އެހެނިހެން އިސް ފަރާތްތަކާ ބައްދަލުކުރެއްވުމަށެވެ.
ޗައިނާއާއި އިންޑިއާއަކީ ދިވެހިރާއްޖެއަށް އެންމެ ބޮޑު ދަރަނި ދޫކޮށްފައިވާ ދެ ޤައުމެވެ.
ރަސްމީ ތަފާސްހިސާބުތަކުން ދައްކާގޮތުގައި މިއަހަރުގެ ފުރަތަމަ ކުއާޓަރގައި ދިވެހިރާއްޖޭގެ ބޭރުގެ ދަރަނި ހުރީ 3.37 ބިލިއަން ޑޮލަރުގައެވެ. މިއީ ޖީ.ޑީ.ޕީގެ ގާތްގަނޑަކަށް 45 އިންސައްތައެވެ.
ބޭރުގެ ދަރަނީގެ ގާތްގަނޑަކަށް 20 އިންސައްތަ ނިސްބަތްވަނީ ޗައިނާއަށެވެ. އިންޑިއާއަށް ނިސްބަތްވަނީ 18 އިންސައްތައަށްވުރެ ކުޑަކޮށް ދަށް އަދަދެކެވެ.
ޒަމީރުގެ ދަތުރުފުޅު އައީ މޫޑީސް ރޭޓިންގްސްއިން ދިވެހިރާއްޖޭގެ ކްރެޑިޓް ރޭޓިންގ އެއް ނޮޗް ދަށްކޮށް ސީއޭއޭ2 އަށް ބަދަލުކުރިތާ ދުވަސްކޮޅެއް ފަހުންނެވެ. މިއީ މަތީ ކްރެޑިޓް ރިސްކެއް ކަމުގައި ބެލެވެއެވެ.
ރޭޓިންގ އެޖެންސީ ފިޗްއިން ޖޫން މަހު ދިވެހިރާއްޖޭގެ ރޭޓިންގ ދަށްކޮށްފައިވަނީ ބޭރު ފައިސާގެ ރިޒާވް ދަށްވަމުން ދިއުމަކީ މާލީ ނުރައްކަލެއް ކަމަށް ބުނެއެވެ.
އެ އެޖެންސީން ބުނެފައިވަނީ މިއަހަރު ސަރުކާރުގެ ދަރަނި އަދާކުރުމުގެ ޒިންމާތައް، 409 މިލިއަން ޑޮލަރަށް އަރާނެ ކަމަށާއި، މިކަމުން ނުރައްކާތެރި ޙާލަތެއް އިތުރުވެގެންދާނެ ކަމަށެވެ.
