ދިވެހިރާއްޖޭގެ ޑިމޮކްރަސީ ދުވަހެއް ދުވަހަކަށް ކުރިއަރަމުންދާ ކަމުގައި އިލެކްޝަންސް ކޮމިޝަންގެ ރައީސް ފުވާދު ތައުފީގް ވިދާޅުވެއްޖެއެވެ. ގައުމީ ޔުނިވަރސިޓީގެ ޕޮލިޓިކަލް ސައިންސް ދަރިވަރުން އިންތިޒާމުކުރި ޕަބްލިކް ފޯރަމެއްގައި ވާހަކަފުޅު ދައްކަވަމުން، ފުވާދު ފާހަގަކުރެއްވީ ދުނިޔޭގެ ޑިމޮކްރަސީއާއި ދިވެހިރާއްޖޭގެ ޑިމޮކްރަސީ ވަނީ ގުޅިލާމެހިފައި ކަމަށެވެ.
ފުވާދު އިތުރަށް ވިދާޅުވީ، ދުނިޔޭގެ ޑިމޮކްރަސީގެ ތާރީޚު 2500 އަހަރަށްވުރެ ދިގު ނަމަވެސް، ގިނަ ޤައުމުތަކުގައި ޑިމޮކްރަސީ ކުރިއަރަމުން ނުދާކަމުގައެވެ. އޭނާ ފާހަގަކުރެއްވި ގޮތުގައި، ގިނަ ޤައުމުތަކުގައި ޑިމޮކްރަސީ ވަކި ހިސާބަކަށް ދިޔުމަށްފަހު، އެހެން ބާވަތެއްގެ ވެރިކަމަކަށް ބަދަލުވެގެންދާ ކަމަށެވެ.
ދިވެހިރާއްޖޭގެ ޑިމޮކްރަސީއާ ބެހޭގޮތުން ވާހަކަދައްކަވަމުން ފުވާދު ވިދާޅުވީ، ރާއްޖޭގައި ޑިމޮކްރަސީގެ އުސޫލުތައް ފުރަތަމަ ޖުމްހޫރިއްޔާއިން ފެށިގެން ތަޢާރަފުވަމުން އައިސްފައިވާ ކަމުގައެވެ. އެގޮތަށް، ޑިމޮކްރަސީގައި ލިބިދޭންޖެހޭ ގިނަ ހައްގުތަކެއް 2008 ވަނަ އަހަރު އައު ޤާނޫނު އަސާސީއާއެކު ކަށަވަރު ކުރެވިގެންދިޔަ ކަމަށްވެސް ފުވާދު ވިދާޅުވިއެވެ.
މި ފޯރަމުގައި ޤައުމީ ޔުނިވަރސިޓީގެ ދަރިވަރުން ޑިމޮކްރަސީއާ ގުޅޭ ތަފާތު މަޢުލޫމާތު ހިއްސާކޮށް، ޕޯސްޓަރުތަކެއް ދައްކާލާފައިވެއެވެ. ބައިނަލްއަޤްވާމީ ޑިމޮކްރަސީ ދުވަސް ފާހަގަކުރަނީ ކޮންމެ އަހަރެއްގެވެސް ސެޕްޓެމްބަރު 15 ވަނަ ދުވަހުއެވެ. މި އަހަރުގެ ޝިޢާރަކީ މަސްނޫޢީ ސިކުނޑި ބޭނުންކޮށްގެން ހަރުދަނާ ހިންގުމުގެ ނިޒާމެއް ޤާއިމްކުރުމެވެ.
