ރާއްޖޭގެ ޑިމޮކްރެޓިކް ނިޒާމު ބިނާކުރަންވާނީ އިސްލާމްދީނާއި ދިވެހިވަންތަ އާދަކާދަތަކުގެ މައްޗަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ ބައިނަލްއަޤްވާމީ ޑިމޮކްރަސީ ދުވަހާ ގުޅިގެން އެކްސްގައި ޙިއްޞާކުރެއްވި ޕޯސްޓެއްގައެވެ.
އެ ޕޯސްޓުގައި ރައީސް ފާހަގަކުރެއްވި ގޮތުގައި ދިވެހި ޤައުމު ހިންގުމުގައި ޑިމޮކްރެޓިކް ނިޒާމު ބިނާވާންވާނީ އިސްލާމްދީނާއި، ދިވެހި ރައްޔިތުން ޤަބޫލުކުރާ ހަމަތަކާއި، ދިވެހިވަންތަ އާދަކާދަތަކުގެ މައްޗަށެވެ. ރައީސް މުއިއްޒު ވެރިކަމަށް ވަޑައިގެންނެވުމަށްފަހު ގައުމިއްޔަތު މާއްދާ ސްކޫލު ނިޒާމުގެ ތެރެއަށް ތައާރަފް ކުރައްވާފައެވެ.
ބައިނަލްއަޤްވާމީ ޑިމޮކްރަސީ ދުވަސް ފާހަގަކުރަނީ ކޮންމެ އަހަރެއްގެ ސެޕްޓެމްބަރު މަހުގެ 15 ވަނަ ދުވަހުއެވެ. ރާއްޖެއަކީ ދެކުނު އޭޝިއާ ސަރަޙައްދުގައިވެސް ޑިމޮކްރަސީ އެންމެ ޅަފަތުގައި އޮތް ޤައުމުތަކުގެ ތެރެއިން ޤައުމެކެވެ. ރާއްޖޭގައި ގިނަ ޕާޓީ އެކުލެވޭ ރިޔާސީ އިންތިޚާބެއް ފުރަތަމަ ފަހަރަށް ބޭއްވުނީ 2008 ވަނަ އަހަރުއެވެ. އެއަށްފަހު ރާއްޖޭގައި ވެރިކަން ކުރަމުންދަނީ ސިޔާސީ ޕާޓީތަކުންނެވެ.
ކޮމެންޓު ފޮނުވާ