ސަރުކާރު ހިންގާ މައި ޕާޓީ، ޕީޕަލްސް ނެޝަނަލް ކޮންގްރެސް (ޕީއެންސީ) އިން އައްޑޫސިޓީ އަދި ކުޅުދުއްފުށިސިޓީގައި މެންބަރުން އިތުރުކުރުމުގެ ހަރަކާތެއް ފަށައިފިއެވެ.
މިއަދާއި މާދަމާ ކުރިއަށްދާނެ މި ހަރަކާތުގައި ޕާޓީގެ ލީޑަޝިޕްގެ އިސް ބޭފުޅުން ބައިވެރިވެ، ދޮރުން ދޮރަށް ހިނގައި މެންބަރުން އިތުރުކުރުމުގެ މަސައްކަތް ކުރަމުން ގެންދެއެވެ.
ޕީއެންސީގެ މެންބަރުންގެ އަދަދު 75,000 އަށް އިތުރުކުރުމަށް ރައީސް ޑރ. މުޙައްމަދު މުޢިއްޒު ނިންމާފައިވާކަން ހާމަކުރައްވާފައިވެއެވެ. މިހާތަނަށް 50,000 މީހުން ޕާޓީގައި ސޮއިކޮށްފައިވާ ކަމަށް ޕީއެންސީގެ ޕާލިމެންޓްރީ ގުރޫޕްގެ ލީޑަރު އަދި ރައްޔިތުންގެ މަޖިލީހުގެ މެޖޯރިޓީ ލީޑަރު އިބްރާހީމް ފަލާޙު ވިދާޅުވެފައިވެއެވެ.
އިލެކްޝަންސް ކޮމިޝަންގެ ދަފްތަރުން ދައްކާ ގޮތުގައި، މިވަގުތު އެންމެ ގިނަ މެންބަރުން ތިބީ އެމްޑީޕީގައެވެ. އެމްޑީޕީގައި 50,980 މެންބަރުން ތިބިއިރު، ދެވަނައަށް އެންމެ ގިނަ މެންބަރުން ތިބި ޕީޕީއެމްގައި 34,827 މެންބަރުން ތިބެއެވެ. ޕީއެންސީގައި މިހާރު ތިބީ 28,704 މެންބަރުންނެވެ. މި ހަރަކާތާއެކު ޕީއެންސީގެ މެންބަރުންގެ އަދަދު އިތުރަށް މައްޗަށް ދާނެކަމަށް ބެލެވެއެވެ.
