ދުނިޔޭގެ ކްރެޑިޓް ރޭޓިން ފާމް މޫޑިސްއިން ރާއްޖެއަށް ދީފައިވާ ކްރެޑިޓް ރޭޓިންއަށް ބަދަލު ގެނެސް، ރާއްޖޭގެ ރޭޓިން ސީއޭއޭ1އިން ސީއޭއޭ2އަށް ދަށް ކޮށްފައިވެއެވެ.

މި ބަދަލު ގެނެސްފައިވަނީ ކުރިއަށް އޮތް ދެ އަހަރު ދައްކަން ޖެހޭ ދަރަނި އިތުރުވުމުގެ ސަބަބުންނެވެ. އަންނަ އަހަރު 600 މިލިއަން ޑޮލަރާއި 2026 ވަނަ އަހަރު އެއް ބިލިއަން ޑޮލަރު ދައްކަންޖެހޭކަން މޫޑީސްއިން ފާހަގަކޮށްފައިވެއެވެ.

އަދި ނިމިދިޔަ ސަރުކާރުން ޗާޕުކޮށްފައިވާ އަށް ބިލިއަން ރުފިޔާގެ ސަބަބުން ބާޒާރުގައި ދައުރުވާ ފައިސާއާއެކު، ޑޮލަރަށް އޮންނަ ޑިމާންޑު ބޮޑުވެ، އެކްސްޗޭންޖް ރޭޓް ދަމަހައްޓަން ގޮންޖެހުންތައް ކުރިމަތިވެފައިވާކަންވެސް ފާހަގަކޮށްފައިވެއެވެ.

މޫޑީސްއެކޭ އެއްގޮތަށް މިދިޔަ މަހު ފިޗްއިން ވެސް ވަނީ ރާއްޖޭގެ ރޭޓިން ސީސީސީ އިން ސީސީއަށް ދަށްކޮށްފައެވެ. ދެ ފާމްއިން ވެސް ރޭޓިން ދަށްކުރުމާ ގުޅޭ ގޮތުން ފާހަގަކޮށްފައި ވަނީ އެއް މައްސަލަތަކެކެވެ.

ގައުމުގެ އިގުތިސާދީ ހާލަތު ރަނގަޅު ކުރުމަށް ޓަކައި މި ސަރުކާރުން އަންނަނީ މާލީ އިސްލާހީ ފިޔަވަޅުތަކެއް އަޅަމުންނެވެ. މީގެ ތެރޭގައި ސަރުކާރުގެ ކުންފުނިތަކުގެ ހިންގުން ހަރުދަނާކުރުމުގެ ގޮތުން ބައެއް ކުންފުނިތައް އެއްކޮށްލައި، ދައުލަތަށް ގެއްލުންވަމުންދާ ކުންފުނިތައް އުވާލުމުގެ މަސައްކަތް ހިމެނެއެވެ.

ފިނޭންސް މިނިސްޓަރު ޑރ. މުޙައްމަދު ޝަފީގު ވިދާޅުވެފައިވަނީ ސަރުކާރުން ކުރިން ލަފާކުރި ވަރަށް ވުރެ މިހާރު ރިޒާވް އިތުރު ވަމުން އަންނަ ކަމަށާއި ރައީސް ޑރ. މުޙައްމަދު މުއިއްޒުގެ އިރުޝާދާ އެއްގޮތަށް އަޅަމުން އަންނަ ފިޔަވަޅުތަކުގެ ނަތީޖާއެއްގެ ގޮތުން އިތުރު ހެޔޮ ބަދަލުތައް އަންނާނެ ކަމަށެވެ.

މިދިޔަ މަސް ނިމުނުއިރު ރާއްޖޭގެ ރަސްމީ ރިޒާވާއި ބޭނުންކުރެވޭ ރިޒާވްވެސް ވަނީ އިތުރުވެފައެވެ. ޖުމްލަ ރިޒާވް 444 މިލިއަން ޑޮލަރަށް އަރާފައިވާއިރު، ބޭނުންކުރެވޭ ރިޒާވް 61.22 މިލިއަން ޑޮލަރަށް އިތުރުވެފައިވެއެވެ.

އެމްއެމްއޭގެ ތަފާސްހިސާބުތަކުން ދައްކާގޮތުގައި ސޮވަރިން ޑިވެލޮޕްމަންޓް ފަންޑް (އެސްޑީއެފް)ގެ ޔޫއެސް ޑޮލަރު ކަސްޓޯޑިއަން އެކައުންޓްގައި މިހާރު 65 މިލިއަން ޑޮލަރު ހުރިއިރު، މިއީ މިދިޔަ އަހަރުގެ ނޮވެންބަރު މަހާ އަޅާބަލާއިރު 60 މިލިއަން ޑޮލަރުގެ އިތުރުވުމެކެވެ. މީގެ މައިގަނޑު ސަބަބަކީ ސޮވަރިން ޑިވެލޮޕްމަންޓަށް ވަންނަ ޑޮލަރު މާރުނުކޮށް އެ ފަންޑުގައި ބަހައްޓަމުން ދިޔުމެވެ.

ރާއްޖޭގެ ރަސްމީ ރިޒާވްގެ ހާލަތު ރަނގަޅުކުރުމަށް މިހާރު ކުރަމުން އަންނަ މަސައްކަތްތަކުގެ ތެރޭގައި މާލީ ވުޒާރާއާއި އެމްއެމްއޭއާ ގުޅިގެން އިންޑިއާއާއެކު ފޮރިން ކަރަންސީ ސްވޮޕް އެރޭންޖްމަންޓެއް ގާއިމުކުރުމުގެ މަސައްކަތް ހިމެނެއެވެ. މީގެ އިތުރުން، ސަރުކާރުގެ ޚަރަދުކުޑަކުރުމަށްޓަކައި ފިސްކަލް ޕޮލިސީއެއް އެކުލަވައިލާ ތަންފީޒުކުރުމުގެ މަސައްކަތްވެސް ސަރުކާރުންދަނީ ކުރަމުންނެވެ.