މާލޭ މަގުތަކުގެ ރައްކާތެރިކަން ކަށަވަރު ކުރުމަށް ރައީސް މުއިއްޒު އަޅުއްވަން އެންގެވި ފިޔަވަޅުތަކުގެ ދަށުން، މޮޑިފައިކޮށް، އާންމުންނަށް އުނދަގޫވާ ގޮތަށް ބަދަލުކޮށްފައި ހުންނަ އުޅަނދުތައް މަސް ދުވަހަށް ހިފެހެއްޓުމުގެ ބާރު ފުލުހުންނަށް ދީފައިވެއެވެ.
މި ބާރު ދިނުމަށް ނިންމާފައިވަނީ ހުޅުމާލޭގައި ސްޕޯޓްސް ކާރަކާއި ސައިކަލެއް ޖެހި މިދިޔަ ހަފުތާގައި ހިނގި އެކްސިޑެންޓުގައި މީހަކު މަރުވުމާ ގުޅިގެންނެވެ. މަގުމަތީގެ ރައްކާތެރިކަން ކަށަވަރު ކުރުމަށް ރައީސް ޑރ. މުހައްމަދު މުއިއްޒު އަޅުއްވަން ނިންމެވި ފިޔަވަޅުތަކުގެ ތެރެއިން މިއީ އެއް ފިޔަވަޅެވެ.
ރައީސް ވަނީ ހުޅުމާލެއިން ރޭސިންގ އަދި ޑްރިފްޓިންގއަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ދީފައިވާ ހުއްދަ ބާތިލްކުރުމާ އެކު، ހަރުކަށި ފިޔަވަޅުތަކެއް އިޢުލާންކުރައްވާފައެވެ. މީގެ ތެރޭގައި ސައިލެންސަރު ބަދަލުކޮށްގެން، އަޑުގަދަކޮށް ދުއްވުން ހުއްޓުވުމަށް އެފަދަ އާލާތްތައް މަނާކުރަން ޤާނޫނާއި ގަވާއިދުތައް އިޞްލާޙު ކުރުންވެސް ހިމެނެއެވެ.
އެއްގަމު ދަތުރުފަތުރު ކުރުމާބެހޭ ޤާނޫނުގެ ދަށުން ފުލުހުންގެ ބެލުމުގެ ދަށަށް ގެންދާ އުޅަނދާ ބެހޭ ގަވާއިދަށް އިއްޔެ އިޞްލާޙުތަކެއް ގެނެސްފައިވެއެވެ. މި އިޞްލާޙުގައިވާ ގޮތުން، އުޅަނދުގެ ސައިލެންސަރުގެ އަޑުގަދަވާގޮތަށް، އާންމުންގެ ހިތްތަކުގައި ބިރުވެރިކަން އުފެއްދުމަށް ސައިލެންސަރަށް ބަދަލު ގެނެސްގެން ދުއްވުމުގެ ސަބަބުން ހިފަހައްޓާ އުޅަނދު ދޫކުރާނީ އެ އުޅަނދަކަށް ގެނެސްފައިވާ މޮޑިފިކޭޝަން ރަނގަޅު ކުރުމަށްފަހުގައެވެ.
އާންމުންނަށް އުނދަގޫވާ އަޑު އަންނަ ގޮތަށް ސައިލެންސަރު މޮޑިފައި ކޮށްފައިވާނަމަ، އެކަން ރަނގަޅު ކުރުމަށް ވެރިފަރާތަށް އަންގާ އެންގުމަށް ޢަމަލު ނުކޮށްގެން ފުލުހުން ޓޯ ކޮށްފައިވާ އުޅަނދެއްނަމަ 15 ދުވަހުގެ ތެރޭގައި އޭގެ އަޞްލާ އެއްގޮތަށް ބަދަލު ކުރަންޖެހޭނެއެވެ. އަދި ސައިލެންސަރު ނުވަތަ ބަރުގޮނުން އާންމުންގެ ހިތްތަކުގައި ބިރުވެރިކަން އުފެދޭ އަޑު އަންނަ ގޮތަށް މޮޑިފައި ކޮށްފައިވާނަމަ، ފުލުހުން އެ އުޅަނދު ހިފެހެއްޓި ތާރީޚުން ފެށިގެން 30 ދުވަސް ހަމަވުމުން ސައިލެންސަރު ނުވަތަ ބަރުގޮނު ކުރިން ހުރި ގޮތަށް ބަދަލު ގެންނާނެއެވެ.
މާލޭގައި ސައިލެންސަރަށް ބަދަލު ގެނެސް، އާންމު އުނދަގުލަކަށްވާ ގޮތަށް ދުއްވާ ވެހިކަލްތައް ވަރަށް އާންމުކަމާއި، އެ ދުއްވާ މީހުންނާއި އެ އުޅަނދުތަކާ މެދު ފިޔަވަޅު ނޭޅޭތީ އާންމުން އެކަމުގެ ޝަކުވާ ކުރާތާ އެތައް ދުވަހެއް ވެއްޖެކަން ފާހަގަކުރެވެއެވެ.
