ބަންގްލަދޭޝްގެ ޗިޓަގޮންގް މެޑިކަލް ކޮލެޖު ހޮސްޕިޓަލުގައި އިންޓަރންޝިޕް ފުރިހަމަކުރަމުންދާ ދިވެހި ދެ ޑޮކްޓަރަކަށް ދެވުނު ހަމަލާއާ ގުޅިގެން، މި މައްސަލަ ސިޔާސީ ނުކުރުމަށް ރާއްޖޭގެ ޚާރިޖީ ވުޒާރާއިން ވަނީ ގޮވާލައިފިއެވެ. އަދި މި ހާދިސާއަކީ ރާއްޖޭގައި ތިބި ބަންގްލަދޭޝް މީހުން ޑީޕޯޓްކުރަމުންދާތީ ހިނގި ކަމެއް ނޫންކަން ފާހަގަކޮށްފައިވެއެވެ.
ޚާރިޖީ ވުޒާރާއިން މަޢުލޫމާތު ދިން ގޮތުގައި، މި ހާދިސާގައި ދެ ދިވެހި ޑޮކްޓަރުންނަށް މާބޮޑު އަނިޔާއެއް ލިބިފައެއް ނުވެއެވެ. އަދި މިފަދަ ހާދިސާއެއް އަލުން ތަކުރާރުނުވާނެކަމުގެ ޔަޤީންކަން ހޮސްޕިޓަލުގެ މެނޭޖްމަންޓުން ދީފައިވާކަމަށް ވިދާޅުވިއެވެ.
މި ހާދިސާއާ ގުޅިގެން، އެ ހޮސްޕިޓަލުގައި މަސައްކަތްކުރާ ދިވެހި ދަރިވަރުން ވަނީ ހޮސްޕިޓަލުގެ ޑިރެކްޓަރާ ބައްދަލުކޮށްފައެވެ. މި ބައްދަލުވުމުގައި، ހާދިސާ ހިނގަން މެދުވެރިވީ ވޯޑުތަކުގެ ސެކިއުރިޓީ ދަށްވުމުގެ ސަބަބުންކަމަށް ފާހަގަކުރެވުނެވެ. އަދި ކުރިއަށް އޮތްތަނުގައި ވޯޑުތަކުގެ ސެކިއުރިޓީ އިތުރަށް ހަރުދަނާކުރެވޭނެކަމުގެ ޔަޤީންކަން ދިވެހި ޑޮކްޓަރުންނަށް ދެވިފައިވާކަމަށް ޚާރިޖީ ވުޒާރާއިން ވިދާޅުވިއެވެ.
ޗިޓަގޮންގް މެޑިކަލް ކޮލެޖު ހޮސްޕިޓަލަކީ ގިނަ އަދަދެއްގެ ދިވެހި ޑޮކްޓަރުން އިންޓަރންޝިޕް ފުރިހަމަކުރަމުންދާ ތަނެއްކަން ފާހަގަކޮށްލެވެއެވެ.
