ފެނަކަ ކުންފުނިން އެކި ފަރާތްތަކަށް ދައްކަންޖެހޭ ދަރަނީގެ ތެރެއިން މިހާތަނަށް 800 މިލިއަން ރުފިޔާ ދައްކާ ނިމިފައިވާ ކަމަށް ފެނަކަ ކޯޕަރޭޝަނުގެ މެނޭޖިންގ ޑިރެކްޓަރ މުޢާޒު މުޙައްމަދު ރަޝީދު ވިދާޅުވެއްޖެއެވެ. މި މަޢުލޫމާތު އޭނާ ހާމަކުރެއްވީ ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމުގައި ރޭ ވާހަކަ ދައްކަވަމުންނެވެ.
މި ސަރުކާރު އައިއިރު ފެނަކައިގެ ދަރަނި 4.3 ބިލިއަން ރުފިޔާގައި ހުރިއިރު، މިހާރު އެ އަދަދު 4.1 ބިލިއަން ރުފިޔާއަށް ދަށްކުރެވިފައިވާކަމަށް މުޢާޒު ވިދާޅުވިއެވެ. ދަރަނި ދެއްކުމުގައި ޚާއްޞަ އިސްކަމެއް ދެވިފައިވަނީ ރަށްރަށުގެ ކުދި ވިޔަފާރިތަކަށް ދައްކަންޖެހޭ ފައިސާއަށް ކަމަށާއި، މިހާތަނަށް 280 އަށްވުރެ ގިނަ ފަރާތްތަކަށް ފައިސާ ދެއްކިފައިވާ ކަމަށްވެސް އޭނާ ވިދާޅުވިއެވެ.
ފެނަކައިގެ ދަރަނި މިހާ މަތީގައި ހުރުމުގެ މައިގަނޑު ސަބަބަކީ އެސްޓީއޯއަށް ދައްކަންޖެހޭ ބޮޑު އަދަދެއްގެ ފައިސާ ކަމަށް މުޢާޒު ފާހަގަކުރެއްވިއެވެ. އަދި މިހާރު އޮތް ޕްލޭނާ އެއްގޮތަށް ކަންތައް ކުރެވިއްޖެނަމަ، 2027 ވަނަ އަހަރުގެ މެދުތެރޭގައި ފެނަކައިގެ ހުރިހާ ދަރަންޏެއް ދައްކާ ޚަލާސްކުރެވޭނެ ކަމަށް ލަފާކުރެވޭ ކަމަށްވެސް އޭނާ ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނިންމެވުމަކާ ގުޅިގެން، މިއަހަރުގެ ނިޔަލަށް ފެނަކަ ކޯޕަރޭޝަން އެސްޓީއޯގެ ސަބްސިޑަރީ ކުންފުންޏަކަށް ބަދަލުކުރުމުގެ މަސައްކަތް މިހާރު ދަނީ ކުރެވެމުންނެވެ. މި ބަދަލާއެކު ފެނަކައިގެ ހިންގުން ހަރުދަނާކޮށް، ބޮޑެތި ބަދަލުތަކެއް ގެނައުމަށް ވަނީ ރޭވިފައެވެ.
މުޢާޒު ވިދާޅުވީ މި ބަދަލުގެ ސަބަބުން ފެނަކައިން ތެލަށް ކުރަންޖެހޭ ޚަރަދު ވަރަށް ބޮޑަށް ކުޑަކުރެވި، ހިންގުން ހަރުދަނާވާނެ ކަމަށެވެ. އަދި ރައްޔިތުންނަށް ދެމުންދާ ޚިދުމަތް މެދުނުކެނޑި ދެވޭނެ ކަމަށްވެސް އޭނާ ޔަޤީންކަން ދެއްވިއެވެ.
